देश राजनीति

प्रदेश १: कांग्रेस र एमालेको आग्रहपछि प्रदेशसभा बैठक कात्तिक १५ गतेसम्मका लागि स्थगित

विराटनगर, ७ कात्तिक । प्रदेश १ को प्रदेशसभा बैठक कात्तिक १५ गतेसम्मका लागि स्थगित भएको छ । आज एक सूचना जारी गरी कात्तिक १५ गतेसम्मका लागि बैठक स्थगित गरिएको जानकारी दिइएको हो ।

नेपाली कांग्रेस र नेकपा (एमाले) ले प्रदेशसभा बैठक स्थगित गर्न माग गरेका थिए । सोहीबमोजिम बैठक स्थगित गरिएको हो । नेपाली कांग्रेसले प्रधानमन्त्री शेरबहादुर देउवाको भ्रमणकाे कारण देखाउँदै बैठक स्थगित गर्न माग गरेको थियो ।

त्यस्तै एमालेले पनि बैठक स्थगित गर्न माग गरेको थियो । ९ कात्तिकमा पार्टीको पालिका अधिवेशन रहेकाे, १० र ११ कात्तिकमा पार्टीको स्थायी कमिटीको बैठक, १२ र १३ गते केन्द्रीय कमिटीको बैठक रहेकाले १४ गते बाटोको म्याद राखेर १५ कात्तिकसम्म बैठक स्थगित गर्न एमालेले माग गरेको हो ।

प्रदेशसभाका सचिव गोपाल प्रसाद पराजुलीका अनुसार प्रमुख प्रतिपक्षी नेपाली कांग्रेस र सत्तारुढ नेकपा (एमाले) को लिखित अनुरोधमा बैठक स्थगित गरिएको हो ।

आगामी कात्तिक १५ गते दिउँसो साढे १२ बजे बैठक बस्ने छ । उक्त बैठक आजका लागि निर्धारण गरिएको कार्यसूची बमोजिम हुने पनि प्रदेशसभाले जनाएको छ ।

आज मुख्यमन्त्री भीम आचार्यले प्रदेशसभामा पेस गरेको विश्वासको मत सम्बन्धी प्रस्तावमा मत विभाजन हुने कार्यसूची थियो ।

Featured