देश राजनीति

मन्त्रीबाट डोवाटेको नाम काटिएकोमा शेखर भन्छन्, ‘अक्षम्य भूल, दलितमाथि अपमान’

नेपाली कांग्रेसका नेता डा. शेखर कोइरालाले गण्डकी प्रदेशको मन्त्रिपरिषद् विस्तारमा दलित सांसदको नाम काटिनु दुर्भाग्यपूर्ण भएको टिप्पणी गरेका छन् ।

नेता कोइरालाले आइतबार फेसबुकमा स्टाटस लेख्दै पार्टीले अक्षम्य भूल गरेको बताएका छन् । ‘लोकतान्त्रिक समाजवाद र समावेशीताबाट नेपाली कांग्रेस कहिल्यै पर जान सक्दैन र जानु पनि हुन्न । तर गण्डकी प्रदेशको सरकारले पूर्णता पाउने क्रममा समावेशीता र अझ दलित समुदायको प्रतिनिधित्वलाई जसरी लत्याइयो, यो दुर्भाग्यपूर्ण हो,’ उनले लेखेका छन्, ‘पार्टीले गरेको अक्षम्य भूल हो । दलित समुदायप्रतिको अपमान हो ।’

गत शुक्रबार मुख्यमन्त्री कृष्णचन्द्र नेपाली पोखरेलले गण्डकीको मन्त्रीमण्डललाई पूर्णता दिएका थिए । त्यसमा कांग्रेसका निष्ठावान् नेता मानिने तनहुँका डोवाटे विश्वकर्माको नाम थियो । अन्तिम समयमा उनको नाम काटियो । डोवाटेको ठाउँमा व्यापारिक पृष्ठभूमिका कस्केली सांसद विन्दुकुमार थापा मन्त्री बने ।

गण्डकीको घटनाले पार्टी संगठनमा महत्त्वपूर्ण भूमिका खेलेको दलित समुदायको शिर निहुरिएको उनको भनाइ छ । यसको जवाफ पार्टीले दिनुपर्ने नेता कोइरालाले बताएका छन् ।

‘भोलि कुन मुखले उनीहरूको अगाडि जाने ? यो हेक्का राख्नु पर्दैन ? कि एकपटक सरकारमा गएपछि सधैँलाई पुग्यो ? सामाजिक न्यायका कुरा केवल इतिहासको बखान र शब्द रटान मात्रै होइन व्यवहार र लोकतान्त्रिक आचरण पनि हो,’ उनले लेखेका छन्, ‘ बीपी स्मृति दिवस मनाउँदै र वीपीको तस्वीरमा चढाएको फूल नओइलिँदै गर्दा भएको यो निर्णयको जवाफ हामीले समाजलाई दिनैपर्छ ।’

Featured