देश

कोरोना पोजेटिभ महिलालाई विराटनगरका अस्पतालले भर्ना लिन मानेनन्, अस्पताल चहार्दा चहार्दै मृत्यु

विराटनगर, ६ वैशाख । कोरोनाको एन्टीजेन पोजिटिभ एक महिलाको उपचार नपाएरै मृत्यु भएको छ । मृत्यु हुनेमा उदयपुर गाइघाटकी ३५ वर्षीया जैनव खातुन रहेकी छिन् । उनलाई एन्टीजेन पोजिटिभ भएको रिपोर्ट आएपछि विराटनगरका अस्पताल ल्याइएको थियो । तर, कुनै अस्पतालले उपचार नगरी रिफर मात्रै गर्दा उनको मृत्यु भएको पारिवारिक स्रोतले बताएको छ ।

विराटनगरको अस्पताल चोकमा रहेको गोल्डेन अस्पताल पु¥याइएकी उनको त्यहाँ कोरोनाको एन्टीजेन परीक्षण भएको थियो । रिपोर्ट पोजिटिभ आएपछि गोल्डेन अस्पतालले उनलाई भर्ना लिन अस्वीकार गर्यो ।

त्यसपछि विराट मेडिकल लगेको र उसले पनि भर्ना लिन नमानेको एम्बुलेन्स चालक राजा मियाँले बताए । त्यसपछि म्याक्स अस्पतालमा लैजान खोज्दा म्याक्सले पनि नल्याउनु भन्ने जवाफ दिएको थियो ।

त्यसपछि विरामीका आफन्त कोशी अस्पताल पुगेका थिए । बिहान चार बजे कोशी अस्पताल पुगेपछि बिरामीलाई आइसोलेसन भर्ना गरियो । तर उपचार सुरु भएन । आफन्तले बिरामीलाई नोवेल अस्पताल पु¥याएका थिए ।

नोवेलले पनि भर्ना लिन नमानेपछि उनलाई पुनः कोशी अस्पताल पु¥याइएको थियो । अस्पताल चहार्दा चहार्दै उनको बिहान साढे ६ बजे मृत्यु भएको थियो । कोशी अस्पतालका मेडिकल सुपरिटेन्डेट डा. चुमनलाल दासले बिरामीको अक्सिजन लेभल न्यून भएका कारण विरामीको मृत्यु भएको दावी गरे ।

Featured