देश

यो वर्ष पनि लागेन सुनवर्षीमा ‘सिरुवा’ मेला

विराटनगर, २ बैशाख । वर्षेनी नयाँ वर्षको आगमन सँगै तराईमा हर्सोउल्लासका साथ मनाइने ‘सिरुवा पर्व’ यो वर्ष पनि कोराना भाइरस(कोभिड–१९) को संक्रमणको जोखिमका कारण प्रभावित भएको छ । विषेश गरेर नयाँ वर्षको आगमनसँगै तराईका मुख्य सुनसरी, मोरङ र झापामा मनाइने सिरुवा पर्व यस वर्ष कोरोना भाइरसको जोखिमका कारण प्रभावित भएको हो ।

बैशाख १ गतेदेखि सुरु हुने नयाँ वर्ष प्रारम्भ भएसँगै पूर्वी तराईका विषेश गरि राजवंशी, ताजपुरिया, गन्गाई, माझी, थारुलगायतका आदीवासी समुदायको पर्व सिरुवा सुरु हुने गरेको छ ।

परम्परागत रुपमा हर्षोउल्लासका साथ ग्राम तथा महाराज थानमा ग्राम देवता र घरमा कुल पुजा गरेर मनाइने सिरुवा यस वर्ष भने कोरोनाका कारण खल्लो भएको सरोकारवालाहरुले बताएका छन् ।

उनीहरुले यस वर्षको पनि सिरुवा पर्व हर्षोल्लासकासाथ मनाउँन नपाउने भएका हुन् । राजवंशी, ताजपुरियालगायतका आदीवासी समुदायले सिरुवा पर्वमा बैशाख १ गते पानी सिरुवा, २ गते कादो सिरुवा र ३ गते रंग सिरुवा मनाउँने गरेको मोरङको रतुवामाई नगरपालिकाका ताजपुरिया समुदायका अगुवा मुण्डिलप्रसाद ताजपुरियाले जानकारी दिए ।

‘सिरुवा हाम्रो मुख्य पर्व हो । नयाँ लुगा लगाउने, मिठा मिठा परिकार खाने, परिवार, गाउँ, समाज र राष्ट्रको शान्ति एवम समृद्धिका लागि ग्राम थान र महाराजथानमा गएर पुजा अर्चना गर्ने हाम्रो प्रचलन छ । थानहरुमा भव्यरुपले मेला लाग्ने गरेको छ ।’ उनले भने,‘यो वर्ष पनि कोरोनाका कारण निकै खल्लो भएको छ । यो वर्ष पनि कोरोनासँग विजय प्राप्त गर्ने कामनासहित घर–घरमा पुजा अर्चना गरेर सामान्य रुपले मनाइरहेका छौँ ।’

सिरुवा पर्वमा साथीभाई तथा गाउँलेहरु भेला भई आपसमा पानी, कादो(हिलो) र रंग दलेर मनाउने चलन रहेको पूर्वमन्त्री एवम् राजवंशी समाज विकास समितिका केन्द्रीय अध्यक्ष भीमराज राजवंशीले बताए ।

उनले सामूहिक रुपमा सिरुवा खेल्ने, मेला बजार लगाउने तथा सिरुवा साँस्कृतिक कार्यक्रमहरु पर्वका अवसरमा आयोजना गर्ने गरिएनी यो वर्ष पनि संस्था मार्फतनै कोरोरा संक्रमणको जोखिमलाई मध्यनजर गर्दै आ आफ्नो घरमा मात्र पर्व मनाउन आग्रह गरिएको जानकारी दिए ।

सिरुवा हाम्रो सवैभन्दा ठुलो चाड भएपनि कोरोनाका कारण पहिला जसरी मनाउने अवस्था छैन । जिवन रहेमात्र अरुकुरा हुन्छ । पहिले जस्तो नभएपनी ज्यान बाँचे आगेसाल खेलौँला, रमाउँला ।’ उनले भने ,‘सिरुवा मनाउँन खोज्दा आफू, परिवार र समाज जोखिममा पर्न सक्नेप्रति हामी सजग रहनुपर्छ ।’

सिरुवाको अवसर पारेर वैशाख महिनैभरी सुनसरी, मोरङ र झापाका ग्राम तथा महाराजथान सुनसान देखिएका छन् । यी जिल्लाका थानहरुमा लाग्ने सिरुवा मेलाहरु यस वर्ष पनि स्थानीयतहहरुलेनै रोक लगाएका छन् ।

सिरुवा पर्वमा रतुवामाई नगरपालिका–५ स्थित सुनवर्षी महाराजथानमा लाग्ने प्रदेश १ कै सवैभन्दा ठुलो मेला यस वर्ष पनि लागेन । नगर प्रमुख रवीन राईले कोरोना संक्रमणको जोखिमका कारण नगरका सवै थानहरुमा वर्षेनी लाग्ने मेलाहरु लगाउन रोक लगाइएको जानकारी दिए ।

सुनवर्षी महाराजथान व्यवस्थापन समितिका अध्यक्ष कुमार बुढाथोकीले यो वर्ष सामान्य पुजा पाठ मात्र भएको जानकारी दिनुभयो । ‘पहिला ठुलो मेला लाग्थ्यो । तर, गत वर्ष र यसपालि कारोनाका कारण लाग्न सकेन । सामान्य पुजापाठ मात्र भयो ।’ उनले भने ।

त्यसैगरी सुनवर्षीको भेडुवाथान, काँटा मेला लगायत रतुवामाई, रंगेली नगरपालिका, धनपालथान र कटहरी गाउँपालिकालगायत सवै ग्राम तथा महाराज थानमा लाग्ने मेला स्थगीत गरिएको ती पालिकाहरुले जनाएका छन् ।

Featured