देश राजनीति

सरकार सबै देशसँग मैत्री सम्बन्ध राख्न प्रतिबद्ध : मन्त्री ज्ञवाली

पछिल्लो चरणमा दुवै छिमेकी भारत र चीनसँगको सम्बन्ध थप सौहार्द बनेको धारणा व्यक्त गर्दै उनले नेपालले आफ्नो भूमिमा छिमेकीविरूद्ध कुनै गतिविधि नगर्न प्रतिबद्धता पूरा गरेको बताए । भारतसँगको उच्चस्तरीय आर्थिक साझेदारीले नेपालले महत्वपूर्ण परियोजनामा राम्रो प्रगति हासिल गरेको उल्लेख गर्दै मन्त्री ज्ञवालीले चीनसँग पनि घनिष्ट एवं सौहार्दपूर्ण सम्बन्ध रहेको र नेपाल एक चीन नीतिप्रति पूर्ण प्रतिबद्ध रहेको बताए ।

नेपालले छिमेकीबाहेक विकास साझेदारका साथै नेपाली आप्रवासी कामदारको गन्तव्य देशसँग घनिष्ट र सहकारी सम्बन्ध कायम राखेको उनको भनाइ थियो । विकास साझेदार र ठूला शक्तिहरुसँग पनि नेपालको सम्बन्ध सदैव सौहार्दपूर्ण र सहयोगी नै रहेको मन्त्री ज्ञवालीले बताए ।

महामारीका समयमा पनि नेपालले राम्रो प्रदर्शन गरेको र सबै नागरिकलाई निःशुल्क कोराना विरुद्धको खोपहरू उपलब्ध गराएको बताउँदै उनले यस अवधिमा गरिबी निवारण, प्रतिव्यक्ति आम्दानी, शिक्षा, स्वास्थ्य, खानेपानी र सरसफाइ, ऊर्जा उत्पादन, पूर्वाधार निर्माणमा महत्वपूर्ण उपलब्धि हासिल गरेको तथ्याङ्क सुनाए ।

मन्त्री ज्ञवालीले मुलुकको पछिल्लो राजनीतिक घटनाक्रमका बारेमा  सर्वोच्च अदालतको फैसलापछि राष्ट्रपतिबाट यही २३ फागुनमा संसद्को बैठक बोलाउन आह्वान भइसकेको बताउँदै सरकार लोकतान्त्रिक प्रक्रियाप्रति दृढ प्रतिबद्ध रहेको संवैधानिक प्रणालीमा पूर्ण विश्वास राख्ने बताए । कार्यक्रममा परिषद्का अध्यक्ष हेमन्त खरेल, सचिव भुवन पाठकलगायतले परिषद्को गतिविधि र दृष्टिकोणबारे प्रकाश पारे । रासस

Featured