देश राजनीति

नेकपा प्रवक्ता भन्छन् : पार्टी संवेदनशील मोडमा छ, ओलीजीले बैठकमा आएर निष्कर्ष दिनुहोला

नेकपाका सचिवालय सदस्य एवं पार्टी प्रवक्ता नारायणकाजी श्रेष्ठले पार्टी संवेदनशील मोडमा पुगेको बताएका छन् । बुधबारको सचिवालय बैठकपछि संचारकर्मीहरूसँग कुराकानीका क्रममा पार्टी गम्भीर मोडमा रहेकोले आगामी बैठकमा अध्यक्ष केपी शर्मा ओली सहभागी हुने अपेक्षा र विश्वास आफूहरूले गरेको बताए ।

‘हाम्रो पार्टी अहिले गम्भीर र संवेदनशील मोडमा छ । त्यसैले हामी यो असमान्य परिस्थितिमा संवेदनशीलताका साथ नै प्रक्रिया अगाडि बढाउन छलफलको बहसको प्रक्रिया अगाडि बढाउन र निर्णय लिनु उचित हुन्छ भन्छौँ,’ उनले भने, ‘त्यसकारणले गर्दा अध्यक्ष ओली आउनुभएन भने के गर्ने भन्ने बारेमा हामी सोच्नै चाहदैनौँ । हामी अपेक्षा मात्र होइन विश्वस्त छौँ कि अध्यक्ष केपी शर्मा ओली अर्को बैठकमा उपस्थित भएर पार्टीको अहिलेको संकटको निवारण गर्ने छलफललाई सार्थक निष्कर्षमा पुर्‍याउन योगदान गर्नुहुनेछ ।’

अध्यक्ष ओली अनुपस्थित भएपछि नेकपाको आजको सचिवालय बैठक पनि प्रभावित भएको छ । पार्टी प्रवक्ता श्रेष्ठले अध्यक्ष ओली उपस्थित नभएपछि २० मंसिरका लागि बैठक सारिएको बताए । सचिवालय बैठकले पार्टीमा देखा परेको संकट र विद्यमान समस्या समाधानका लागि अध्यक्ष ओलीको समेत उपस्थितिमा बैठक बस्नु उचित हुने भन्ने निष्कर्षका साथ आगामी बैठकमा उपस्थिति हुन अनुरोध गर्ने निर्णयसहित २० मंसिरका लागि बैठक बोलाइको प्रवक्ता श्रेष्ठले बताए । १८ मंसिरका लागि बोलाइएको स्थायी कमिटी बैठक पनि २१ मंसिरका लागि सारिएको बताए ।

‘आजको बैठकले पार्टीमा देखा परेको संकट र विद्यमान समस्याको समाधानको लागि प्रधानमन्त्री समेत रहनुभएका अध्यक्ष ओलीको समेत उपस्थितिमा छलफल गर्नु आवश्यक उपयुक्त र उचित हुन्छ भन्ने निष्कर्षका साथ अध्यक्ष ओलीको आगामी बैठकमा अनिवार्य उपस्थितिको अपेक्षसहित उहाँलाई बैठकमा आउन अनुरोध गर्ने निष्कर्षका साथ अव सचिवालयको बैठक आगामी २० गते १ बजे र पूर्वनिर्धारित १८ गते देखि सुरु हुने स्थायी कमिटीको बैठक २१ गते १ बजेदेखि प्रारम्भ हुने निर्णय गरिएको छ’ उनले भने ।

Featured