देश

बीपी प्रतिष्ठानमा थप दुई संक्रमितको मृत्यु

विराटनगर,  १० कात्तिक-सुनसरीको धरानस्थित बीपी कोइराला स्वास्थ्य विज्ञान प्रतिष्ठानमा कोरोना भाइरसको संक्रमणबाट थप दुई जनाको मृत्यु भएको छ । मृत्यु हुनेमा मोरङका एक पुरुष र सुनसरी धरानका एक महिला रहेका छन् । मोरङका पुरुषको आइतबार साँझ र धरानकी महिलाको आज बिहान मृत्यु भएको प्रतिष्ठानले जनाएको छ ।  

धरान- १६ का ८६ वर्षीया महिलाको सोमबार विहान ३ बजेर ५ मिनेटमा मृत्यु भएको हो । आइतबार कोरोना पोजिटिभ देखिएकी ती महिलालाई सोमबार बिहान प्रतिष्ठानको कोभिड अस्पतालमा उपचारका क्रममा मृत्यु भएको हो । त्यस्तै,  गएराति १० बजे मोरङको पथरीशनिश्चरे- ३ का ६३ वर्षीय पुरुषको पनि कोरोनाबाट मृत्यु भएको छ ।

१ कात्तिकमा कोरोना पोजिटिभ देखिएका उनलाई ४ कात्तिकमा प्रतिष्ठानको कोभिड अस्पतालमा भर्ना गरिएकोमा उपचारका क्रममा मृत्यु भएको प्रतिष्ठानका सहप्रवक्ता डा. आशिष श्रेष्ठले जानकारी दिए । मृतक पुरुष मधुमेहका दिर्घरोगी रहेको जनाइएको छ ।

Featured