विदेश

बेल्जियमकी पहिलो महिला प्रधानमन्त्री सोफियाको अवस्था गम्भीर

एजेन्सी, ७ कात्तिक-बेल्जियमकी पहिलो तथा एक मात्र पूर्व महिला प्रधानमन्त्री सोफिया विल्मेसको स्वास्थ्य अवस्था गम्भीर भएको छ । कोरोना भाइरसबाट सङ्क्रमित भएपछि गम्भीर अवस्थामा पुगेकी विल्मेसलाई अति सघन कक्षमा राखेर उपचार गराइएको छ । पूर्व प्रधानमन्त्री भएपनि उनी अहिले उपप्रधानमन्त्री तथा विदेश मन्त्रीका रुपमा कार्यरत छिन् ।

उनको अवस्था अहिले स्थिर रहेको विदेश मन्त्रालयका प्रवक्ता एल्के पट्टीनले जनाएका छन् । विल्मेस बेहोस अवस्थामा नरहेको र उनको अवस्था पनि चिन्ताजनक नरहेको उनले स्पष्ट पारेका छन् ।

४५ वर्षीया विल्मेसलाई बुधबार बेलुका मात्रै अस्पताल भर्ना गरिएको अधिकारीहरुले जानकारी दिएका छन् । उनी आफ्नो पारिवारिक सदस्यबाट गत हप्ता सङ्क्रमित भएकी थिइन् । बेल्जियममा पछिल्लो समयमा कोरोना भाइरसबाट सङ्क्रमित भएकाहरुको सङ्ख्या अत्यधिक वृद्धि भइरहेको छ । कोरोना भाइरसकै कारण बेल्जियममा अहिलेसम्म दश हजारभन्दा बढीको मृत्यु भएको सरकारी अधिकारीहरुले जानकारी दिएका छन् ।

Featured