देश

ओली नहुँदा नेकपाको सचिवालय बैठक प्रचण्डले चलाउने

काठमाडौं, भदौ ५-सत्तारुढ दल नेपाल कम्युनिस्ट पार्टी (नेकपा) ले एकताका बाँकी काम तथा सचिवालय बैठक अध्यक्ष पुष्पकमल दाहाल ‘प्रचण्ड’ले सञ्चालन गर्ने भएका छन्।

बिहीबार प्रधानमन्त्री निवास बालुवाटारमा बसेको नेकपा सचिवालय बैठकले प्रधानमन्त्री तथा नेकपाका अध्यक्ष केपी शर्मा ओलीको अनुपस्थितिमा  अर्का अध्यक्ष प्रचण्डले सचिवालय बैठकको सञ्चालन गर्ने बाटो खुलेको हो।

यसअघि पार्टी सचिवालयको बैठक दुवै अध्यक्षहरूको उपस्थितिमा हुँदै आएको थियो। ओली र प्रचण्डले यसअघिका बैठकहरू सहअध्यक्षतामा सञ्चालन गर्दै आएका थिए।

बिहीबार बिहान बसेको सचिवालय बैठकले अब अध्यक्ष प्रचण्डको मात्रै अध्यक्षतमा पनि बैठक सञ्चालन गर्न सक्ने निर्णय गरेपछि अर्का अध्यक्ष ओली अनुपस्थित भए पनि पार्टी निर्णयका बाँकी काम रोकिने छैनन्।

नेकपाले प्रवास कमिटी, छ महानगरको अध्यक्ष र सचिव तथा बाँकी केन्द्रीय सदस्यहरूको कार्यविभाजन टुंगो लगाउन बाँकी छ।

बैठकपछि पार्टी प्रवक्ता नारायणकाजी श्रेष्ठले उपचारका सिलसिलामा सिंगापुर जान लागेका प्रधानमन्त्री ओली ७/८ दिन उतै बस्ने भएकाले यसबीचमा पार्टीले गर्नुपर्ने निर्णय अर्का अध्यक्षको नेतृत्वमा हुने समझदारी आजको बैठकमा भएको जानकारी दिए।

उनले प्रचण्डको अध्यक्षतामा छिट्टै बैठक बस्ने पनि बताएका छन्।

Featured