विदेश

अफगानी तालिबानसँग शान्तिवार्ताको तयारीमा अमेरिकी राष्ट्रपति ट्रम्प

वासिङटन, साउन ३२–अफगानी तालिबान समूहसँग शान्ति सम्झौताको तयारीबारेमा राष्ट्रपति डोनाल्ड ट्रम्प र उच्च अमेरिकी सल्लाहकारबीच कुराकानी भएको र छलफल ‘निकै राम्रो’ भएको ह्वाइट हाउस स्रोतले बताएको छ।

राष्ट्रपति ट्रम्पलाई न्यूजर्सी्स्थित आफ्नै गृहनगर बेडमिनिस्टरमा अमेरिकी सुरक्षा सल्लाहकारहरूसहित रक्षामन्त्री मार्क एस्पर, विदेशमन्त्री माइक पोम्पेओ तथा सैनिक प्रमुख जनरल जोसेफ डनफोर्डबीच अफगानी शान्ति प्रक्रियाका विषयमा भएको प्रगतिबारे जानकारी गराइएको थियो।

उक्त अवसरमा राष्ट्रिय सुरक्षा सल्लाहकार जोन बोल्टन र तालिवानी समूहसँग वार्ता गर्न जिम्मेवारी पाएका जाल्मे खालिलजादको पनि उपस्थिति थियो। डेपुटी प्रेस सेक्रेटरी होगान गिड्लीद्वारा ह्वाइट हाउसमा जारी विज्ञप्तिमा भनिएको छ, “अफगानी सरकार, तालिवान समूहसँग शान्ति तथा मेलमिलापका लागि भइरहेको हाम्रो वार्ताबारे केन्द्रित रहेको थियो भने कुराकानी सार्थक बनेको छ।”

छलफलबारे राष्ट्रपति ट्रम्पले पनि शनिबार ट्विटरमा लेखेका छन्, “अफगानिस्तानका विषयमा भएको वार्ता भर्खरै सकिएको छ। १९ वर्ष लामो अफगानी युद्धमा अमेरिकी सहयोगमा बनेको अफगानी सरकारका विरोधमा रहेका धेरैजसो व्यक्ति तथा समूहहरू सम्भव भएसम्म सम्झौता गर्ने पक्षमा देखिएका छन्।”

यससँगै अफगानिस्तानको शान्तिका लागि सम्झौता हुने सम्भावना बढेको छ भने अमेरिकाले अफगानिस्तानमा लड्दै आएका आफ्ना १४ हजार सेनालाई फिर्ता गर्ने सम्भावना बढेको छ। वासिङ्टनले अफगानिस्तानबाट आफ्नो सेनालाई सकेसम्म छिटो स्वदेश फिर्ता गर्न चाहिरहेको छ।

संयुक्त राष्ट्रसंघको तथ्याङ्कअनुसार गत वर्ष अफगानिस्तानमा ९ सय २७ बालबालिकासहित ३ हजार ८ सय ४ सर्वसाधारणको द्वन्द्वसम्बन्धी विभिन्न घटनामा परी निधन भएको थियो। यस्तै द्वन्द्वका कारण अफगानिस्तानमा यस वर्षको ७ महिनामा २ लाख १७ हजार नागरिक आन्तरिक तथा बाह्य रूपमा विस्थापित बनेका राष्ट्रसंघ मानवीय सहायता मामिला कार्यक्रमले जनाएको छ। द्वन्द्वका कारण अफगानिस्तानमा ठूलो मात्रामा मानवीय सहयोगको आवश्यकता पर्दै आएको छ। (रासस/एएफपी)

Featured