राजनीति

कम्युनिस्टहरूलाई कमिलाजस्तो बन्न सुझाव

बागलुङ, साउन ३२–संघीय मामिला तथा सामान्य प्रशासनमन्त्री लालबाबु पण्डितले कम्युनिस्टहरुलाई गंगटोजस्तो नभई कमिलोजस्तो बन्नुपर्ने बताएका छन् । नेपाल कम्युनिस्ट पार्टी (नेकपा) बागलुङले आयोजना गरेको कार्यकर्ता भेटघाट तथा छलफल कार्यक्रमलाई सम्बोधन गर्दै उनले गंगटो र कमिलाको उदाहरण दिँदै कार्यकर्तालाई एकताबद्ध हुन आग्रह गरे ।

‘गंगटोले आफ्नै अभिभावकलाई देख्न सहँदैन, सिध्याउँछ, कमिलाले एकताबद्ध भएर आफूभन्दा ठूलो काम गर्छ,’ उनले भने, ‘अब कार्यकर्ता गंगटो हैन कमिलो बन्न सिकौँ ।’

उनले कम्युनिस्ट विचार बोकेका मानिस भिडको पछि नलागी असल कार्य गर्न लाग्न सुझाव दिए । ‘अहिलेको सुखी नेपाली समृद्ध नेपाल भन्ने नारा सरकारको मात्र हैन,’ मन्त्री पण्डितले भने, ‘यो त कम्युनिस्टको पनि हो, त्यसैले सानातिना कार्यमा नअल्झिन कार्यकर्तालाई आग्रह गर्दछु ।’

संघीयताको कार्यान्वयन सफल रुपमा हुनु भनेको नेपाल समृद्धतर्फ लम्कनु हो भन्दै मन्त्री पण्डितले सबै कार्यकर्तालाई सकारात्मक सोचका साथ सरकारलाई सहयोग गर्न आग्रह गरे ।

‘हाम्रा नेता तथा कार्यकर्ता साना कुरामा अल्झिने हैन,‘ उनले भने, ‘आन्तरिक किचलो आन्तरिक रूपमै मिलाऊँ बाहिर नल्याऊँ ।’ उनले स्थानीय तहमा कर्मचारीको अभाव छिट्टै हटेर जाने जिकिर गरे ।

सरकार व्यावहारिक परिवर्तनका काम गर्दै आएको भन्दै मन्त्री पण्डितले परिणाम आउन केही समय लाग्ने बताए । उनले सरकार विरोधी तत्वहरु आफैँ निरुत्साहित भएर जानेसमेत दाबी गरे ।

उनले शनिबार बिहानै बागलुङ नगरपालिका–४ कुँडुलेस्थित निर्माणाधीन भूमिगत शालिग्राम संग्रहालयको अनुगमन र कालिका मन्दिरको दर्शन गरेका थिए । (रासस)

Featured