देश

ट्याक्टर दुर्घटना हुँदा तीन जनाको मृत्यु

बाग्लुङ, माघ २४–बाग्लुङमा जन्ती बोकेको ट्याक्टर दुर्घटना हुँदा तीन जनाको मृत्यु भएको छ । तमानखोला गाउँपालिका ३ बुलबुलेमा जन्ती सवार ट्याक्टर दुर्घटना भएको हो । मृत्यु हुनेमा ट्याक्टरमा सवार म्याग्दीको मालिका गाउँपालिका २ का २१ वर्षीया रीता पुन, सोही ठाउँकी ५२ वर्षीया मन कुमारी पुन र ५७ वर्षीय ओम प्रकाश पुन छन् ।

म्याग्दीको मालिकाबाट ३५ जना जन्ती लिएर बाग्लुङको बुंगातर्फ जाँदै गरेको ग १ त ५७६२ नम्बरको ट्याक्टर बिहीबार साँझ पौने ७ बजेतिर दुर्घटना भएको थियो । दुर्घटनामा घाइते भएका ९ जनामध्ये ६ जना उपचारपछि घर फर्केका छन् भने ३ जनाको मिसन अस्पताल पाल्पामा उपचार भइरहेको छ । घुम्तीमा मोड नपुगेर ट्याक्टर अनियन्त्रित भइ सडकबाट करिब ५० मिटर तल खसेर दुर्घटना भएको इलाका प्रहरी कार्यालय बुर्तिबाङले जनाएको छ । चालकलाई प्रहरीले नियन्त्रणमा लिएको छ ।

Featured