देश

विराटनगरकी ७९ वर्षीया वृद्धा चन्द्रकुमारीको उद्धार

विराटनगर, माघ १६–विराटनगरमा एक बिरामी वृद्धाको उद्धार गरिएको छ । विराटनगर– ११, पिचरामा जाडोले कठ्याङग्रिएर बिरामी भई थला परेकी वृद्धा चन्द्रकुमारी ठकुरीको उद्धार गरिएको हो । वृद्धा चन्द्रकुमारीलाई । विराटनगर– ११ का वडा अध्यक्ष तिर्थेन्द्र न्यौपाने र सामाजिक अभियन्ता पेरिस सुवेदीको पहलमा युवाहरूको एक समूहले उद्धार गरेको हो ।

चन्द्रकुमारीलाई हाल विराटनगरस्थित मानव सेवा आश्रममा राखिएको छ । श्रीमानको मृत्यु भएपछि उनी सडकको नालामाथि टिनको छाप्रो बनाएर बस्दै आएकी थिइन् । लामो समयदेखि हिँडडुल गर्न समेत नसक्ने उनको दिसापिसाबसमेत एकै ठाउँमा हुने गरेको थियो । पुसको सुरुवातदेखि नै शीतलहरसँगै बढेको जाडो र बिरामीले थला परेकी उनको जीवन कष्टकर भएको थियो । जाडो बढेपछि उनी तावामा आगो बालेर रात कटाउने गरेकी थिइन् ।

‘यस्तो दहनीय अवस्था रहेकी वृद्धाको पीडा देखेपछि लगातारको प्रयासपछि उहाँको उद्धार गर्न सफल भएका छौँ,’ सामाजिक अभियन्ता सुवेदीले भने, ‘अहिले उहाँको रेखदेख मानवसेवा आश्रममा गरिनेछ ।’ उनले चन्द्रकुमारीको औषधि उपचार पनि आश्रमै भइरहेको जानकारी दिए ।

Featured