विदेश

इराकमा निर्वाचन गर्न अमेरिकाको आग्रह

एजेन्सी, कात्तिक २५–इराकमा समय अगावै संसदीय निर्वाचन गर्न अमेरिकाले इराकी अधिकारीहरुलाई आग्रह गरेको छ । इराकमा हिंसात्मक आन्दोलन जारी रहेकाले अमेरिकाले सो आग्रह गरेको हो । सो आन्दोलन हिंसात्मक भएकोले प्रहरी कारबाहीमा प्रदर्शनकारीको ज्यान पनि गएको छ । उनीहरुले निर्वाचनको माग गरेर आन्दोलन गरेकाले आन्दोलनकारीहरुको माग पूरा गर्न समय अगावै आमनिर्वाचन गर्न अमेरिकाको आग्रह गरेको छ । आइतबार प्रकाशन गरिएको विज्ञप्तिमार्फत अमेरिकाले यस्तो आग्रह गरेको हो ।

यसबाट हिंसा पनि रोकिने भन्दै हिंसात्मक गतिविधिको नियन्त्रणका लागि पनि निर्वाचन आवश्यक रहेको अमेरिकाको माग रहेको छ । निर्वाचनमार्फत आन्दोलनकारीको माग पूरा गरी शान्तिपूर्ण राजनीतिक व्यवस्थापन गर्न अमेरिकाले माग गरेको हो । अमेरिकी राष्ट्रपतिको कार्यालय ह्वाइट हाउसले प्रकाशन गरेको विज्ञप्तिमा भनिएको छ– अमेरिका इराकमा त्यहाँका राष्ट्रपति बरहाम सालेहको यसअघिको प्रतिबद्धता पनि पूरा गर्न माग गर्दछ ।

‘त्यहाँ आन्दोलनका क्रममा आन्दोलनकारी, नागरिक समाजका व्यक्ति, शान्तिपूर्ण रुपमा आफ्नो माग राख्ने व्यक्तिहरु, सञ्चारमाध्यम तथा नागरिक अधिकारकर्मीहरु माथिको निरन्तरको आक्रमणप्रति अमेरिका गम्भीर छ’ सो विज्ञप्तिमा भनिएको छ । यसैगरी इराकले सञ्चारमाध्यमहरुमाथि आक्रमण गर्ने तथा इन्टरनेटमा लगाएको प्रतिबन्धको घटनाको अमेरिकाले निकै नजिकबाट नियालीरहेको पनि सो विज्ञप्तिमा बताइएको छ ।

Featured