देश

तीन महिना पनि टिकेन कालोपत्रे

काठमाडौं, कात्तिक २१–बौद्ध व्यापार संघ र स्थानीयहरूले सडक कालोपत्रे माग राख्दै गत वैशाख अन्तिमतिर बौद्ध क्षेत्रमा सडक नै ठप्प पार्नेगरी आन्दोलन गरे। त्यसपछि स्थानीय र ठेकेदारबीच सडक पिच गर्ने सम्झौता भएसँगै जेठ अन्तिमतिर चावहिल–साँखु सडकखण्डको टुसाल चोकदेखि बौद्ध गेटसम्म करिब एक किलोमिटर सडक कालोपत्रे भयो।

करिब चार वर्षदेखि धुलो र हिलोबाट आक्रान्त बनेका स्थानीय कालोपत्रे भएपछि खुसीले गद्गद् भएका थिए। तर सडक कालोपत्रे भएको तीन महिना नबित्दै कालोपत्रे उप्केर खाल्डाखुल्डी बनेपछि अहिले उनीहरू चिन्तित बनेका छन्। आन्तरिक र बाह्य पर्यटक ओहोरदोहोर भइरहने बौद्ध गेटकै सामु ठूल्ठूला दुईवटा खाल्डा छन्। त्यसैगरी टुसाल चोकको सडकमा कालोपत्रे पुरै उप्किएको छ।

काठमाडौं उपत्यका सडक विस्तार आयोजनाका अनुसार उक्त सडकखण्ड युनाइटेड बिल्डर्स एन्ड इन्जिनियर्स कम्पनीले कालोपत्रे गरेको थियो। कमसल सामग्री प्रयोग गरिएकाले छिट्टै कालोपत्रे उप्किएको स्थानीयको आरोप छ। बौद्धका स्थानीय लाक्पा शेर्पाले सडक खाल्डाखुल्डी भएपछि धुलोले बस्न नसकिने अवस्था आएको बताए। ‘हामीले आन्दोलन गरी दबाब दिएपछि जेठ महिनाको अन्तिममा सडक कालोपत्रे भएको थियो,’ उनले भने, ‘सडक पीच भएपछि धुलो र हिलोेबाट मुक्त भयौं भनेर स्थानीय उत्साहित भएका थियौं। कालोपत्रे उप्केर खाल्डैखाल्डा बनेपछि हाम्रो समस्या ज्यूँका त्यूँ रहयो।’

उनले जेठमा गरिएको कालोपत्रै असारबाटै उप्किन थालेको बताए। ‘ठेकेदारको चरम लापारबाहीका कारण सडक बिग्रिएको भए पनि कारबाही गनुपर्ने सरकार भने मौन छ,’ उनले भने, ‘चार वर्षपछि गरिएको पिच चार महिना पनि नटिक्दा सरकारले चासो दिनुपर्ने हो।’ यो समाचार आजको नागरिक दैनिकले छापेको छ ।

Featured