देश

कांग्रेस पदाधिकारी बैठक आज, उम्मेदवारको टुंगो लगाउने

काठमाडौं, कात्तिक १७–प्रमुख प्रतिपक्षी दल नेपाली कांग्रेसको पदाधिकारी बैठक आज दिउँसो बस्दैछ । सभापति शेरबहादुर देउवा निवास बुढानिलकण्ठमा बस्ने बैठकले आसन्न उपनिर्वाचनमा पार्टीका तर्फबाट उम्मेदवारको टुंगो लगाउने कांग्रेसले जनाएको छ । पदाधिकारी बैठकमा पार्टीका बरिष्ठ नेता रामचन्द्र पौडेल र अर्का नेता कृष्णप्रसाद सिटौला पनि सहभागि हुनेछन् ।

कांग्रेसको शुक्रबार बसेको केन्द्रीय कार्यसमिति बैठकले पार्टीका तर्फबाट उम्मेदवार चयन गर्ने जिम्मा पदाधिकारीलाई दिएको थियो । कांग्रेस विधानमा उम्मेदवार चयन गर्न संसदीय समितिको व्यवस्था छ । तर विधानविपरीत संसदीय समिति गठन भएको भन्दै पार्टी्भित्रबाटै विरोध भएपछि सभापति देउवाले डेढ वर्षअघि समिति विघटन गरेका थिए । त्यसपछि संसदीय समिति गठन हुन सकेको छैन ।

मंसिर १४ गते कास्की निर्वाचन क्षेत्र नं. २ मा प्रतिनिधि सभा र प्रदेश सभा अन्तर्गत बागलुङ, भक्तपुर र दाङमा उपनिर्वाचन हुँदैछ । निर्वाचन आयोगले कात्तिक २१ मा उम्मेदवार मनोनयनको दर्ता मिति तोकेपनि दलहरुले आजसम्म उम्मेदवार तय गर्न सकेका छैनन्। कांग्रेसले तीन जनाको नाम सिफारिस गर्न क्षेत्रीय समितिलाई परिपत्र गरेको थियो । तर जिल्लाबाट धेरै आकांक्षीको नाम सिफारिस भएपछि केन्द्रलाई उम्मेदवार चयन गर्न सकस भइरहेको हो ।

पार्टी्भित्र रहेको गुटउपगुटका कारण पनि उम्मेदवार चयनमा ढिलाइ भएको हो । नेताहरुले गुटका आधारमा उम्मेदवार चयन गर्न खोज्दा समय लागेको हो । कांग्रेस प्रवक्ता विश्वप्रकाश शर्माले आज बस्ने पदाधिकारी बैठकले उम्मेदवारको टुंगो लगाउने दावी गरे । उनले केन्द्रीय समितिको निर्देशन र सुझाव बमोजिम पदाधिकारीले निर्णय गर्ने बताए ।

Featured