देश

विकास ढिलाईविरुद्ध आफैँ आन्दोलनमा उत्रीन्छु :प्रचण्ड

महोत्तरी, कात्तिक १३—सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल (प्रचण्ड)ले मधेसमा सडक तथा पूर्वाधार निर्माणका सवालमा भइरहेको ढिलाईविरुद्ध आफैं आन्दोलनमा उत्रीने चेतावनी दिएका छन्। बुधबार महोत्तरीको पिपरामा आयोजित एक कार्यक्रमलाई सम्बोधन गर्दै प्रचण्डले सडक लगायतका पूर्वाधार निर्माणका विषयमा वर्तमान सरकार गम्भीर रहेको पनि बताए। प्रधानमन्त्री आफैंले समृद्धिको नेतृत्व गरेको उल्लेख गर्दै अध्यक्ष प्रचण्डले निर्माणाधीन अवस्थामा रहेका सडकको काम युद्धस्तरमा अगाडि बढाइने पनि बताए।

महोत्तरीको पिपरा गाउँपालिकाको अध्यक्ष चयनका लागि हुने निर्वाचन केन्द्रित भएर नेकपाले बुधबार पिपरामा छठ पर्वको अवसरमा एउटा कार्यक्रम आयोजना गरेको थियो। कार्यक्रममा बोल्दै अध्यक्ष प्रचण्डले जनकपुर–पिपरा–जलेश्वर–भित्तामोड जोड्ने सडक निर्माणको कार्यलाई तिव्रता दिन भौतिक पूर्वाधार तथा यातायात मन्त्री र प्रधानमन्त्रीसँग समेत कुराकानी गर्ने पनि बताए।

‘यो सडकको विषयमा काठमाडौं फर्किएर प्रधानमन्त्रीसँग कुरा गर्नेछु, युद्धस्तरमा काम भएन भने म पार्टी अध्यक्ष भएर पनि मधेसमा गएर आन्दोलन गर्नुपर्ने अवस्था नआओस् भन्नेछु,’ कार्यक्रममा बोल्दै अध्यक्ष प्रचण्डले भने। आफू प्रधानमन्त्री भएको बेला उक्त सडक निर्माणका लागि ठाडो आदेशमार्फत १ अर्ब रुपैयाँ विनियोजन गर्न लगाएको समेत प्रचण्डले स्मरण गराए।

प्रचण्डले अब पनि उक्त सडक निर्माणमा विलम्ब हुने, ठेक्का प्रक्रिया छिटो टंग्याउनु काम भएमा आफू नै अनसनमा बस्ने पनि प्रचण्डले चेतावनी दिए। आगामी मंसिर १४ मा पिपरा गाउँपालिकाको अध्यक्ष चयनका लागि हुने उपनिर्वाचनमा आफ्नो पार्टी नेकपालाई मतदान गर्न अनुरोध गरेका प्रचण्डले आफ्नो मधेससँगको प्रेम नटुटेको बताए।

Featured