देश

नयाँ बसपार्क क्षेत्रमा वृक्षरोपण

काठमाडौं, असोज ४—नयाँ बसपार्कस्थित मित्रनगरमा वृक्षरोपण गरिएको छ। मित्रनगर विकास तथा सुधार समितिको आयोजनामा आज बिहान चक्रपथ क्षेत्रदेखि म्हैपी मितेरी पुलसम्म वृक्षरोपण गरिएको हो।

वृहत् वृक्षरोपण कार्यक्रमको उद्घाटन गर्दै काठमाडौँ क्षेत्र नं ६ का सांसद भीमसेनदास प्रधानले यो वर्षलाई सरकारले वृक्षरोपण वर्ष घोषणा गरे पनि वृक्षरोपण कार्य प्रभावकारी हुन नसकेको बताए। ‘रुख बिरुवा मासिनुका साथै जनसङ्ख्या वृद्धिका कारण उपत्यकामा तापक्रम दिनानुदिन बढ्दै गएको छ, तापक्रम न्यूनीकरण गरी स्वच्छ, सफा शहर निर्माणमा वृक्षरोपणले सहयोग पुग्नेछ’, उनले भने।

पूर्वरक्षामन्त्री प्रधानले सुन्दर, शान्त र हराभरा काठमाडौँ निर्माणका लागि सांसद विकास कोषबाट सहयोग गर्ने प्रतिबद्धतासमेत व्यक्त गरे। काठमाडौँ महानगरपालिका–२६ का अध्यक्ष ख्यामराज तिवारीले मित्रनगर क्षेत्रलाई सफा, सुन्दर र हरियाली बनाउन वृक्षरोपण कार्यक्रमले सहयोग पुग्ने विश्वास व्यक्त गरे।

पछिल्लो समय नेपालको राष्ट्रिय बसपार्कका रुपमा रहेको नयाँ बसपार्क क्षेत्रमा सुधार आएको उहाँको भनाइ थियो। मित्रनगर विकास तथा सुधार समितिका अध्यक्ष विष्णु पोखरेलले रु सात लाख ६५ हजार लागतमा मित्रनगर क्षेत्रमा २२५ बिरुवा रोप्न लागिएको बताए। ‘हरियाली मित्रनगर निर्माणका लागि वृक्षरोपण गर्न लागेका हौँ’, उनले भने।

समितिले चक्रपथ क्षेत्रमा वृक्षरोपण गर्ने भने पनि चक्रपथ विस्तारका क्रममा रुख काटिने भएकाले मित्रनगरभित्र वृक्षरोपण गर्न लागेको समितिका उपाध्यक्ष गङ्गा पन्तले जानकारी दिए। मित्रनगर विकास तथा सुधार समितिले आगामी दिन नयाँ बसपार्क क्षेत्र वरपर ६ सय बिरुवा रोप्ने योजनासमेत बनाएको छ। विसं २०६४ मा स्थापना भएको समितिले मित्रनगर क्षेत्रको विकास र सुधारका लागि काम गर्दै आइरहेको छ। (रासस)

Featured