देश

प्रहरीले धनगढी भन्सारबाट समात्यो अवैध रकम भित्र्याउने भारतीय नागरिक

धनगढी, भदौ २०–भारतबाट नेपालतर्फ ल्याउँदै गरेको २९ लाख ८० हजार अवैध रकमसहित प्रहरीले शुक्रबार दिउँसो एक भारतीय नागरिकलाई धनगढी भन्सार नाकाबाट पक्राउ गरेको छ । यूपी ३१ एके ७३४८ नम्बरको कारबाट २५ लाख नेपाली र तीन लाख भारतीय रुपैयाँसहित भारत पलिया खिरी घर भइ धनगढी उपमहानगरपालिक–१ बस्ने अतुल बर्मालाई पक्राउ गरिएको जिल्ला प्रहरी कार्यालय कैलालीका प्रमुख प्रहरी उपरीक्षक सुदीप गिरीले जानकारी दिए ।

विशेष सूचना पाएपछि नाकामा गाडी कुरेर बसेको प्रहरीले त्रिनगर भन्सार नाकामा इन्ट्री गरिसकेपछि गाडी नियन्त्रणमा लिएको हो । चालकको खुट्टा राख्ने स्थानको तल्लो भागमा तीन लाख भारतीय र सोही गाडीको आगाडिको ढोका छेउको बाकसबाट पच्चिस लाख नेपाली रकम बरामद गरिएको प्रहरीले जनाएको छ । रकमको स्रोत र नेपाल ल्याउनुको उद्देश्यबारे अनुसन्धान भइरहेको प्रहरीले जनाएको छ ।

Featured