देश

मृत भेटिएका गाइगोरुको घटनामा संलग्नलाई कारवाहीको माग गर्दै ज्ञापन पत्र

विराटनगर, भदौ १७ सुर्खेतको वीरेन्द्रनगर नगरपालिका कटकुवास्थित दैलेख सुर्खेत सडकखण्डको जंगलमा केहिदिन अघि मृत भेटिएका गाइगोरुको घटनामा संलग्नलाई कारवाहीको माग गर्दै डेढ दर्जन बढी संघसंस्थाले प्रधानमन्त्रीलाई ज्ञापनपत्र पठाएका छन् ।

उँ कार परिवारकारुपमा एकत्रित भएका ती संस्थाहरुले जिल्ला प्रशानसन कार्यालय मोरङ मार्फत प्रधानमन्त्रीलाई ज्ञापन पठाएका हुन् । उनीहरुले सो घटनामा १८ गाई र ६ वटा गोरु मृत भेटिएको तथा सयौंको संख्याका गाइगोरुलाई भीरबाट लडाएर गम्भीर घाइते बनाइएको घटनामा संलग्नको पहिचान गरि कारवाही गर्न माग गरेका हुन् ।

हिन्दु जागरण नेपालका मोरङ सचिव कुशलकुमार निरौलाले घटनामा संलग्नको पहिचान गरि दोषीलाई प्रचलित कानुन अनुसार कारवाही गर्न माग गरे । उनले संबिधानको प्रस्तावना ९ (३) मा गाईलाई राष्ट्रिय जनावरकोरुपमा मानिएको बताउदै राज्यपक्ष गम्भीर भएर घटनाको अनुसन्धान र कारवाही गर्नुपर्ने बताए ।

प्रधानमन्त्रीलाई सम्बोधन गरि लेखिएको सो आशयको ज्ञापनपत्र सनातन धर्म सेवा समिति मोरङका अध्यक्ष शिवदत्त भट्टराईले मोरङका सहायक प्रमुख जिल्ला अधिकारी अनुज भण्डारीलाई बुझाएका थिए । ज्ञापनपत्र बुझदै सहायक प्रमुख जिल्ला अधिकारी भण्डारीले फ्याक्स मार्फत प्रधानमन्त्रीको सचिवालयलाई सो ज्ञापनपत्र पठाइने जानकारी दिए ।

ज्ञापन बुझाउन श्री लक्ष्मीनारायण मन्दिर पाञ्चालीका मठाधिश स्वामी अच्युत प्रपन्नाचार्य सहित हिन्दु जागरण नेपाल,बैदिक कर्मकाण्ड परिषद,ब्राम्हण समाज,निम्बार्क बैष्णव परिषद,बैष्णव युवा परिषद,जैन समाज र रामानन्दाचार्य सेवा पिठ चतराधाम सहित विभिन्न संघसंस्थाका प्रतिनिधि जिल्ला प्रशासन कार्यालय पुगेका थिए । दैलेख सुर्खेत सडकखण्डको जंगलमा गएको भदौ १२ गते २४ वटा गाइगोरु मृत र अन्य दजनौ घाईते अवस्थामा भेटिएका थिए ।

Featured