देश

मोटरसाइकल चोरी मुद्दाका आरोपित हत्कडी खोलेर भागे

काठमाडौं, भदौ १०-मोटरसाइकल चोरी गरेको आरोपमा प्रहरीले नियन्त्रणमा लिएका दुईजना फरार भएका छन्। प्रहरीका अनुसार ४ भदौमा सितापाइलाबाट प्रकाश तामाङको लु ५२प ८५०५ नम्बरको मोटरसाइकल चोरीमा संलग्न भएको देखिएपछि उनीहरुलाई बुटवलबाट पक्राउ गरेको थियो।

पक्राउ गरेको तीन दिनपछि जिल्ला अदालत रुपन्देहीबाट ५ दिन म्याद थप गरेर विस्तृत अनुसन्धानका लागि वारदात स्थान महानगरीय प्रहरी वृत्त, स्वयम्भुमा ल्याउने क्रममा मंगलबार थानकोटबाट उनीहरु भागेको जनाइएको छ।

रामेछापको लिखु तामाकोशी-१ घर भइ टेकु बस्ने रविन नेपाली र मोटरसाइकल खरिदकर्ता भीमबहादुर सुनुवार फरार भएका हुन्। बिहान करिब साढे ४ बजे सार्वजनिक सवारीबाट प्रहरीको आँखा छलेर हातमा लगाएको हत्कडीसमेत खोलेर उनी फरार भएको महानगरीय अपराध अनुसन्धान महाशाखाले जनाएको छ।

सूचना प्राप्त भएलगत्तै खटिएको टोलीले नेपालीलाई भने पक्राउ गर्न सफल भएको छ। उनी थानकोट आसपासमै लुकीछिपी बसेको अवस्थामा समातिएको प्रहरीले जनाएको छ। पक्राउ गरेका उनलाई आवश्यक अनुसन्धानका लागि स्वयम्भु प्रहरी वृत्तमा पठाइएको छ।

Featured