देश साहित्य

विराटनगरको राष्ट्रसेवक सहकारीको मासिक साहित्यिक शृंखला सम्पन्न

विराटनगर, १४ फागुन । विराटनगरस्थित राष्ट्रसेवक सहकारी संस्था लिमिटेडको मासिक साहित्यिक शृंखला आज सम्पन्न भएको छ । हरेक महिनाको दोस्रो शुक्रबार आयोजना गरिने कार्यक्रममा स्रष्टाहरुले कविता, गीत, गजल, मुक्तक, लघुकथालगायत प्रस्तुत गर्ने गर्दछन् ।

२५ औं शृंखलाका रुपमा आयोजित कार्यक्रममा साहित्यकार मधु पोखरेल अच्युतप्रसाद खतिवडा, रामबाबु दाहाल, ममता मृदुल, भरत गुरागाईं, हरिप्रसाद बराल, मञ्जुश्री गिरी, मीनकुमार नवोदित, लक्ष्मी स्मृति, प्रिन्स प्रमोदकुमार ढकाल, शिवनारायण सिङ्गल, अम्विका खरेललगायत दुई दर्जनभन्दा बढी स्रष्टाहरुले आ–आफ्ना सिर्जना प्रस्तुत गरेका थिए ।

वरिष्ठ साहित्यकार एवं पत्रकार श्रीओम श्रेष्ठ ‘रोदन’को प्रमुख आतिथ्यमा भएको कार्यक्रममा विधान आचार्य, डा. कपिल लामिछाने, दीपक लोहनी, प्रकाश घायललगायतले शुभकामना मन्तव्यसहित आफ्ना सिर्जना वाचन गरेका थिए ।

सहकारीले आर्थिक कारोबार मात्रै नगरेर भाषा, साहित्य र कलाको विकासमा पनि योगदान पु¥याउँदै आएको संस्थाका अध्यक्ष जीवन काफ्लेले बताए । साहित्यमा थोरै भए पनि योगदान पुगोस् भनेर सहकारीले मासिक रुपमा साहित्य गोष्ठी सञ्चालन गरिरहेको उनले उल्लेख गरे ।

Featured