देश

‘सरकारी निकायबिच समन्वय नहुँदा विराटनगरको बजार अनुगमन प्रभावकारी भएन’

विराटनगर, १३ फागुन । बजार अनुगमन प्रभावकारी बनाउन सरकारी निकायबीच समन्वय आवश्यक रहेको एक कार्यक्रमका सहभागिले बताएका छन् । आज विराटनगर महानगरपालिकाको अयोजनामा भएको छलफलमा सहभागिहरूले सरकारी निकायवीच समन्वय नहुँदा अनुगमन प्रभावकारी नभएको बताए ।

कार्यक्रममा उपभोक्ताबादी कृष्णप्रसाद भण्डारी मार्सेलीले बजार अनुगमन गर्ने सरकारी निकायवीच समन्वय नहुँदा कतै एकैदिन धेरै पटक बजार अनुगमन हुने र कतै हुँदै नहुने समस्या रहेको बताए । स्थानिय तहले वडा कार्यालयहरूले वडा कार्यालयबाटै पनि बजार अनुगमन गर्नसक्ने उनले धारणा राखे ।

कार्यक्रममा औषधि व्यवस्था विभाग विराटनगरका निमित्त प्रमुख सञ्जीव शर्मा कट्टेलले औषधि बिक्री वितरणमा धेरै गढबडी रहेको बताए । उनले विशेष गरी निजी अस्पताल आसपासका फार्मेसीहरूले औषधिमा उपभोक्तालाई ठग्ने गरेको जानकारी दिए ।

जनशक्ति अभावका कारण बजार अनुगमन गर्न औषधि व्यवस्था विभागलाई गाह्रो भएको कट्टेलले बताए । कार्यक्रममा विराटनगर महानगरपालिकाकी उपमेयर इन्दिरा कार्कीले बजार अनुगमन भइरहे पनि अनुगमन प्रभावकारी हुन नसकेको गुनासो आइरहेको बताइन् । उनले बजार अनुगमनलाई प्रभावकारी बनाउने विषयमा महानगरपालिकाले सबै निकाय र सरोकालबालाहरूबीच छलफल आयोजना गरेको जानकारी दिइन् ।

कार्यक्रममा मोरङका सहायक प्रमुख जिल्ला अधिकारी ध्रुव खड्का, खाद्य प्रविधि तथा गुण नियन्त्रण कार्यालय विराटनगरका प्रमुख राजकुमार रिजाल, वाणिज्य कार्यालय प्रमुख सन्तोष घिमिरेलगायतले तीनै तहका बजार अनुगमन गर्ने निकायबीच समन्वय गरेर अनुगमन गरे प्रभावकारी हुने बताए ।

Featured