देश

भागरथी हत्या अनुसन्धानमा खटिएका दुई प्रहरीको बढुवा, डीआइजीसहित पाँच जना पुरस्कृत

बैतडीकी १७ वर्षीया भागरथी भट्टको बलात्कारपछि हत्या घटनाको अनुसन्धानमा खटिएका दुई प्रहरीको बढुवा भएको छ । प्रहरी प्रधान कार्यालयले भागरथी भट्ट हत्या अनुसन्धानमा संलग्न दुई प्रहरीलाई एक तह बढुवा गरेको हाे ।

सुदूरपश्चिम प्रदेश प्रहरी प्रमुख डीआइजी उत्तमराज सुवेदीले बढुवा भएका दुवै जनालाई आज दर्ज्यानी चिन्ह प्रदान गरेका छन् । त्यस्तै प्रहरी प्रधान कार्यालयले सोही घटनाका अपराधी पक्रन सफल भएको भन्दै डीआइजी सुवेदीलगायत पाँच जनालाई नगद पुरस्कारसहित सम्मान गरेको छ ।

प्रहरी प्रधान कार्यालयले अनुसन्धानमा खटेका सुदूरपश्चिम प्रदेश प्रहरी कार्यालय, दिपायलका प्रहरी सहायक निरीक्षक (असई) पदमबहादुर थापालाई प्रहरी नायब निरीक्षक (सई) मा बढुवा गरेको छ भने इलाका प्रहरी कार्यालय, राजापुर बर्दिया दरबन्दी भएका प्रहरी जवान नरबहादुर थापालाई प्रहरी हवल्दार पदमा पदोन्नति गरेको हो ।

सुदूरपश्चिम प्रदेश प्रहरी प्रमुख डीआइजी सुवेदीसहित पुरस्कृत हुने अन्यमा जिल्ला प्रहरी कार्यालय बैतडीका प्रमुख डीएसपी नारायणप्रसाद अधिकारी, प्रहरी प्रधान कार्यालय केन्द्रीय अनुसन्धान ब्यूरोका डीएसपी पञ्चकुमार बाखु, महानगरीय प्रहरी कार्यालय रानीपोखरी परिचालन कक्ष दरबन्दीका प्रहरी नायब निरीक्षक दुर्गाकुमार योञ्जन र प्रहरी चौकी हिकिला दार्चुला दरबन्दीका प्रहरी जवान अशोकबहादुर कुँवर छन् ।

पुरस्कृत भएका डीआइजी सुवेदीले प्रहरीले कसैको दबाबमा नरही काम गर्ने वातावरण भएका जस्तोसुकै अपराधीलाई समेत कानुनको कठघरामा उभ्याउन सकिने बताए ।

Featured