देश

प्रदेश १ : नेकपाको आधिकारिक विभाजनपछि मात्रै कसलाई सघाउने भन्नेबारे कांग्रेसले निर्णय लिने

नेकपा आधिकारिक रूपमा विभाजन नभइसकेको भन्दै प्रदेश १ कांग्रेसको बैठकले मुख्यमन्त्री शेरधन राईविरुद्धको अविश्वासको प्रस्तावबारे कुनै निर्णय गर्न सकेन ।

नेपाली कांग्रेसको प्रदेश १ संसदीय दलको बैठकमा मुख्यमन्त्रीविरुद्धको अविश्वासको प्रस्ताव टेबुल भएर प्रक्रियामा गएपछि मात्रै कांग्रेसले परिपक्व निर्णय गर्नुपर्नेबारे छलफल भएको कांग्रेस सचेक सुयर्माराज राईले बताए ।

त्यस्तै, प्रदेशमा विकसित घटना क्रममालाई हेरेर निर्णयमा पुग्नुपर्ने धारणा सांसदहरूले राखेका छन् । बैठकमा कानुनी ढंगले नेकपा विभाजित भएपछि मात्रै कुन समूहलाई समाउने भन्ने निर्णय गर्नुपर्ने धारणा आएको उनले बताए ।

बैठकमा बोल्ने क्रम जारी रहेको छ र अहिलेसम्मको छलफलबाट जबसम्म विधिवत् रूपमा विभाजित भएर आउँदैन तबसम्म नेकपा एउटै हो ठान्नुपर्नेमा सबैजना एकमत रहेको उनले बताए ।

‘नेपाली कांग्रेसले यो गुठ र त्यो गुठ भनेर धारणा बनाउनु जरुरी छैन । जबसम्म विधिवत् रूपमा विभाजित भएर आउँछ तबसम्म नेकपा एउटै हो । कानुनी ढंगले नेकपा विभाजित भएपछि कुन समूहलाई समाउने भन्ने निर्णय त्यतिबेला पुग्छौँ । हामी तटस्थ बस्छौँ, हामीले निकास दिन्छौँ’ उनले भने । भोलि संसद संचालपछि आउने घटना र संसद कसरी अगाडि बढ्छ भन्ने हेरेर कांग्रेसले थप निर्णय गर्ने पनि उनले बताए ।

Featured