देश

निर्वाचनले पूर्वाधार विकासका काम रोकिँदैन : मन्त्री नेम्वाङ

काठमाडौं, १ माघ-भौतिक पूर्वाधार तथा यातायातमन्त्री वसन्तकुमार नेम्वाङले निर्वाचनका कारण पूर्वाधार विकासका काम नरोकिने बताएका छन् । सरकारले कुनै पनि विकास आयोजनामा बजेट अभाव हुन नदिने बताउँदै मन्त्री नेम्वाङले निर्वाचनकै कारण कुनै पनि विकास आयोजनाको काम नरोकिने बताए ।

तमोर करिडोर सडकअन्तर्गत पाँचथरको हेंवा खोलामा हेंवा खेला पुल (बेली ब्रिज)को आज शिलान्यास गर्दै मन्त्री नेम्वाङले सरकार निर्वाचनमा जुटे पनि पूर्वाधार विकासमा कुनै पनि असर पर्न नदिन उत्तिकै सचेत रहेको बताए । ‘विकासका आयोजना र सामाजिक सुरक्षाका क्षेत्रमा कहीँ पनि बजेट अभाव हुने छैन’, मन्त्री नेम्वाङले भने, ‘बरु सबै सरकारी निकायमा बजेट खर्च बढाउनुपर्ने आवश्यकता छ ।’

१४८ किलोमिटरको तमोर करिडोर सडकको ट्र्याक खोल्ने काम यसै आर्थिक वर्षमा सम्पन्न गरिने जानकारी दिँदै मन्त्री नेम्वाङले यो सडक दुई छिमेकीलाई जोड्ने सबैभन्दा द्रुत र प्रभावकारी सडकका रुपमा विकास हुने विश्वास व्यक्त गरे । पूर्वाधार विकाससँगै स्थानीयवासीको आयआर्जन अभिवृद्धिमा स्थानीय सरकार केन्द्रीत हुनुपर्नेमा मन्त्री नेम्वाङले जोड दिए ।

तमोर करिडोरको ट्र्याक खोलिएसँगै सडक सञ्चालनमा ल्याउन पुष्पलाल (मध्यपहाडी) राजमार्ग योजना कार्यालय फिदिमले हेंवा खोलामा ५४.७५ मिटरको पुल (बेली ब्रिज) निर्माण थालेको हो । ४.२ मिटर चौडाको यो पुलको कूल लागत ९६ लाख ७५ हजार रहेको योजना कार्यालयका प्रमुख सुरेश न्यौपानेले जानकारी दिए । ३२ टन कूल भार क्षमताको यो पुल आगामी तीन महिनामा निर्माण सम्पन्न हुने न्यौपानेले बताए ।

Featured