देश

नेकपा सचिवालयमा ओली–प्रचण्डको प्रस्तावमाथि छलफल सुरु, बिवाद मिलाउन आयो यस्तो बिकल्प

काठमाडौं, मंसिर १६-सत्तारुढ नेपाल कम्युनिष्ट पार्टी (नेकपा) को सचिवालय बैठकमा अध्यक्षद्वय केपी शर्मा ओली र पुष्पकमल दाहाल, प्रचण्डले राख्नुभएको प्रस्तावमा आजबाट औपचारिक छलफल अघि बढेको छ ।

आज बसेको सचिवालय बैठकमा प्रधानमन्त्रीसमेत रहनुभएका अध्यक्ष ओलीबिरुद्ध आरोप लगाउँदै प्रचण्डले राख्नुभएको प्रस्ताव र प्रतिउत्तरमा ओलीले राख्नुभएको प्रस्तावमाथि केन्द्रित रहेर औपचारिक छलफल अघि बढेको हो । बैठकपछि प्रवक्ता नारायणकाजी श्रेष्ठले दिनुभएको जानकारीअनुसार आज अध्यक्षद्वय ओली र प्रचण्डले आफ्नो थप धारणा राख्नुभएपछि सचिवालयका सदस्यहरुले आफ्नो धारणा राख्नेक्रम अघि बढेको छ । बैठकमा धारणा राख्ने नेताहरुले औपचारिकसँगै नेताहरुबीच अनौपचारिक संवादसमेत आवश्यक रहेको औल्याएको प्रवक्ता श्रेष्ठले जानकारी दिनुभयो ।

‘दुवै प्रतिवेदनमाथि औपचारिक छलफल सुरु भएको छ, पार्टीको संकटद समाधानको सन्दर्भमा प्रस्तुत दुवै अध्यक्षको प्रस्तावमाथिको छलफल जारी छ,’ प्रवक्ता श्रेष्ठले भन्नुभयो, ‘अनौपचारिक छलफलसमेत अगाडि बढाउनु पर्छ भन्ने बैठकले ठानेको छ, त्यसक्रममा अनौपचारिक छलफल र संवाद पनि अघि बढाइने छ ।’ प्रवक्ता श्रेष्ठका अनुसार बैठक भोलि १ बजेसम्मका लागि स्थगित भएको छ ।

Featured