मनोरंजन विदेश

एकसाथ देखिँदै बलिउडका तीन खान

एजेन्सी, ४ मंसिर-बलिउडका स्टार तीन खानलाई एकसाथ चलचित्रमा देख्न पाइने भएको छ । आमिर खान स्टारर चलचित्र ‘लाल सिंह चड्ढा’मा आमिरसँगै सलमान खान र शाहरुख खानलाई पनि देख्न पाइने भएको हो । भारतीय संचारमाध्यमका अनुसार ‘लाल सिंह चड्ढा’मा सलमान र शाहरुखले केमियो भूमिका निर्वाह गर्नेछन् ।

शाहरुखले आफ्नो केमियोको छायांकनसमेत सकाइसकेका छन् । उनले आइपीएलको लागि दुबई जानुपूर्व नै आफ्नो केमियोको छायांकन सकाएका हुन् । यस चलचित्रमा शाहरुखले आफ्नो हिट चलचित्र ‘डीडीएलजे’मा निर्वाह गरेको राजको भूमिका निर्वाह गर्नेछन् ।

त्यस्तै, सलमानले ९० को दशकमा निकै रुचाइएको चलचित्र ‘मेने प्यार किया’को प्रेमको भूमिका निर्वाह गर्नेछन् । सलमानको भने छायांकन हुन बाँकी छ ।

तीन खानलाई एकसाथ पर्दामा देख्नपाउनु दर्शकको लागि पक्कै उत्साहको कुरा हुनेछ । त्योसँगै चलचित्रमा करिना कपुर, विजय सेथुपतिको पनि मुख्य भूमिका रहेको छ । चलचित्रलाई अद्भित चन्दनले निर्देशन गरेका हुन् । चलचित्रको रिलिज मिति भने तय भइसकेको छैन ।