खेलकुद देश

एसी मिलान बराबरीमा रोकियो, इब्राहिमोविचले गरे दुई गोल

एजेन्सी, ११ कात्तिक-इटालियन सिरी ए फुटबल अन्तर्गत गएराति भएको खेलमा शीर्ष स्थानको एसी मिलानले रोमासँग बराबरी खेल्दै अंक बाँडेको छ । घरेलु मैदानमा भएको खेलमा एसी मिलान रोमासँग ३–३ गोलको बराबरीमा रोकिएको हो ।

एसी मिलानका लागि दोस्रो मिनेटमा ज्लाटन इब्राहिमोविचले गोल गर्दै अग्रता दिलाएका थिए । तर १४ औं मिनेटमा एडिन जेकोले रोमाका लागि बराबरी गोल फर्काए ।

खेलको ४७ औँ मिनेटमा एलेक्सिज सिलेमेकर्सले गोल गर्दै एसी मिलानलाई पुनः अग्रता दिलाएपनि ७१ औँ मिनेटमा पाएको पेनाल्टीमा जोर्डन वेरेतोउतले गोल गर्दै पुनः खेल बराबरीमा ल्याए ।

७९ औँ मिनेटमा इब्राहिमोविचले पेनाल्टी मार्फत व्यक्तिगत दोस्रो गोल गरेपछि एसी मिलानले पुनः अग्रता बनाएको थियो । तर ८४ औँ मिनेटमा माराश कुम्बुलाले गोल गरेपछि खेल बराबरीमा सकियो । बराबरीपछि शीर्ष स्थानको एसी मिलानको पाँच खेलबाट १३ अंक भएको छ ।