देश

उच्च सतर्कताका साथ विराटनगरबाट हवाई उडान सुरु, पहिलो दिन ६ उडान

विराटनगर, ५ असोज–कोरोना भाइरस महामारी नियन्त्रण गर्न गरिएको लकडाउनपछि गत चैत ११ गतेबाट बन्द हवाइसेवा सोमबारबाट सुरु भएको छ । लामो समयको बन्दपछि सोमबारदेखि सुरु भएको हवाइसेवामा पहिलो दिननै विराटनगर विमानस्थलबाट ६ उडान भएका छन् । वद्ध एयरका तीन र यति एयरलाईन्सका तीन उठान भएका हुन् । सोमबार हवाइसेवा सुरु भएको पहिलो दिन बुद्ध एयरलाईन्सबाट १ सय ८९ र यति एयरलाईन्सबाट १ सय २६ जनाले यात्रा गरेका छन् ।

लामो समयपछि उडान आरम्भ भएको विराटनगर विमानस्थलमा यात्रुहरुमा कोरोना संक्रमणको जोखिम हुन नदिन प्रर्याप्त सुरक्षा प्रवन्ध मिलाइएको नागरिक उड्डयन प्राधिकरण विराटनगरका प्रमुख उत्सव खरेलले बताए ।

सरकारले जारी गरेका सवै मापदण्ड पुरा गरी हवाइसेवा सुरु भएको उनले बताएका छन् । खरेलका अनुसार उच्च सतर्कताका लागि सोमबार बाटै विमानस्थलको मुख्य प्रवेशद्वारमा यात्रुहरुको तापक्रम (ज्वरो) मापन, पार्किङमा अनावश्यक भीड नियन्त्रण गर्न जहाज अवतरण हुनु १५ मिनेट पहिले मात्र यात्रु लिन जान दिने व्यवस्था, चढ्दा र ओर्लदा पनि सामाजिक दुरी पालना गराइएको छ ।

त्यसैगरी सुरक्षा मापदण्ड अनुसार यात्रु चढ्दा र ओर्लदा ४/४ जनाको दरले ओराल्ने र चढाउने व्यवस्था गरिएको थियो । यात्रुहरुर्लाइ सबै सामान लगेज ब्यागमा राख्न लगाइने थियो ।

उडान प्रतिक्षाका क्रममा पनि यात्रुहरुलाई सामाजिक दुरी कायम गराइएको थियो भने सामान बुझ्ने ठाउँमा पनि तोकिएका ठाउँमा उभ्याइएको थियो । आउने र जाने दुबैका लागि हात धुने र सेनिटाइजरको पर्याप्त व्यवस्था मिलाइएको प्राधिकरण प्रमुख खरेलले बताए । विमानस्थलमा यात्रु जाँच गर्ने महिला र पुरुष सुरक्षाकर्मीहरुले पिपिई लगाएर यात्रुको जाँच गरेका थिए ।

उनीहरुको हरेक २ घण्टामा पालो परिवर्तन हुने व्यवस्था गरिएको थियो । विमानस्थलमा यात्रु ओरालिसकेपछि विमान पुरै निर्मलीकरण गर्ने प्रवन्ध मिलाइएको र विमान अवतरणदेखि उडानसम्मको प्रक्रिया पुरा गर्न १ घण्टा समय लाग्नेगरी व्यवस्थापन गरिएको थियो । सोमबारबाट अब नियमित मापदण्ड अनुसार उल्लेखित सवै सुरक्षा सतर्कतालाई निरन्तर दिइने विमानस्थलले जनाएको छ ।

Featured