खेलकुद विदेश

नेइमारमाथिको रंगभेदी टिप्पणीबारे छानविन हुने

एजेन्सी, १ असोज-फ्रेन्च लिग वान क्लब पेरिस सेन्ट–जर्मेन (पीएसजी) का स्ट्राइकर नेइमारमाथि दुई खेलमा प्रतिबन्ध लगाइएको छ । मार्सेलीसँग भएको खेलका क्रममा विवाद गरेपछि रातो कार्ड पाएका नेइमारमाथि दुई खेलको प्रतिबन्ध लागेको हो। उनले आफूमाथि रंगभेदी व्यवहार भएको बताएका थिए ।

फ्रान्सेली फुटबलको प्रशासकीय निकायले आफूमाथि रंगभेदी व्यवहार भएको भन्ने नेइमारको भनाईबारे पनि छानबिन गर्ने जनाएको छ । आइतबार राति भएको खेलमा पीएसजीका तीन र मार्सेलीका दुई गरी पाँच खेलाडीले इन्जुरी समयमा रातो कार्ड पाएका थिए ।

मार्सेलीका डिफेन्डर अल्भारो गोन्जालेजलाई टाउकोमा हिर्काएका कारण नेइमारलाई रातो कार्ड दिइएको थियो । नेइमार सामाजिक सञ्जाल मार्फत पनि आफूमाथि रंगभेदी व्यवहार भएको आरोप लगाउँदै छानबिनका लागि माग गरेका छन्। अल्भारोले भने नेइमारको आरोप अस्वीकार गरेका छन् ।

नेइमारसँगै रातो कार्ड पाएका पीएसजीका डिफेन्डर लेविन कुर्जावालाई ६ खेलका लागि प्रतिबन्ध गरिएको छ । यस्तै पीएसजीका लियान्ड्रो पारेडेसलाई पनि दुई खेलका लागि प्रतिबन्धित लगाइएको छ । मार्सेलीका जोर्डन एमावीलाई तीन खेल र डारिओ बेनेडिट्टोलाई एक खेलको प्रतिबन्ध लगाइएको छ ।

Featured