देश राजनीति

नेकपा स्थायी कमिटी बैठक सकियो : अध्यक्षद्वयको प्रस्ताव सर्वसम्मतिले पारित

काठमाडौं, २६ भदौ-सत्तारूढ दल नेपाल कम्युनिष्ट पार्टी (नेकपा)को १० असारदेखि जारी स्थायी कमिटी बैठक साढे दुई महिनापछि शुक्रबार सकिएकाे छ । बैठकले पार्टी विवाद समाधान गर्न अध्यक्षद्वयले गठन गरेका सुझाव कार्यदलले दिएको सल्लाहअनुसार अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्प कमल दाहाल ‘प्रचण्ड’काे कार्य विभाजन गरेकाे छ । ओली पाँचै बर्ष प्रधानमन्त्री हुने र प्रचण्डले कार्यकारी अध्यक्षका रूपमा पार्टी जिम्मेवारी सम्हाल्ने गरी ४ मंसिर ०७६ काे निर्णय कार्यान्वयन हुने भएकाे छ ।

पार्टी र सरकार संचालनका खाकासहित अध्यक्षद्वयले पेस गरेको १५ बुँदे प्रस्ताव स्थायी कमिटीले सर्वसम्मत पारित गरेकाे छ । ‘अध्यक्षद्वयद्वारा प्रस्तुत प्रस्ताव सर्वसम्मतिले पारित गर्दै पार्टी स्थायी कमिटीको बैठक आज बेलुका ४:०५ बजे उत्साहका साथ सम्पन्न भएको छ’ प्रधानमन्त्रीका प्रेस सल्लाहकार सूर्य थापाले सामाजिक सञ्जाल ट्विटरमा उल्लेख गरे‍का छन्, ‘असार १० गते शुरू भएकाे याे बैठकले अनेक माेड र घुम्ती पार गरेर निष्कर्षमा एकता, समझदारी र सर्वसम्मति कायम गरेकाे छ ।’