देश

भेडेटारमा जीप लाइन बन्दै

धनकुटा, भदौ ४–प्रदेश नम्बर १ को पर्यटकीय नगरी धनकुटाको भेडेटारमा प्रदेशकै पहिलो जीप लाइन बन्ने भएको छ । स्थानीय युवा उद्यमी आशिष राई र किरण राईको करिब तीन करोड रुपैयाँको लगानीमा लगभग एक हजार पाँच सय मिटर लामो जीप लाइन बन्न लागेको हो ।

भिरालो क्षेत्रमा तारमा घिर्नीजस्तै झर्ने खेललाई जीप लाइन भनिन्छ । जीप लाइन ‘लन्च प्याड’ साँगुरी गढी गाँउपालिका वडा नम्बर–६ खर्क डाँडाबाट हुने र सोही वडाकै कार्किछापमा ‘ल्यान्डिङ स्टेशन’ हुने छ ।

यहाँको भूगोल उपयुक्त भएकाले निर्माण गर्न कुनै समस्या नरहेको डिपिआर तयार गर्ने कन्सल्टेन्सी संस्था हार्मोन कन्सल्टेन्सीका इन्जीनियर संखर श्रेष्ठले जानकारी दिए । यो निर्माण भएपछि दक्षिण एसियाको तेस्रो तथा नेपालको दोस्रो लामो ‘जिप लाइन’ बन्ने छ ।

दक्षिण एसियाको सबैभन्दा अग्लो ‘जिप लाइन’ पोखराको सराङकोटदेखी हेम्जा सम्मको एक हजार ८ सय ६० मिटर लामो छ । भेडेटारमा बन्न लागेको यो ‘जीप लाइन’ नेपाल पर्यटन वर्ष २०२० को सुरुवातसँगै सञ्चालन हुने गरी निर्माण शुरु गरिएको व्यवसायी आशिष राइले जानकारी दिए ।

Featured