देश विदेश

काश्मिरी जनताको आत्मनिर्णयको अधिकारलाई सम्मान गर्न आग्रह

काठमाडौं, २० साउन-नेपालका लागि पाकिस्तानका राजदूत मजहर जावेदले काश्मिरी जनताको आत्मनिर्णयको अधिकारलाई सम्मान गर्न भारतसँग आग्रह गरेका छन् । 

भारतले आफ्नो संविधानबाट काश्मिरलाई विशेष अधिकार दिनेसम्बन्धी भारतीय संविधानको धारा ३७० खारेज गरेको एक वर्ष पूरा भएकाे सन्दर्भमा पाकिस्तानी राजदूतावाससँगको साझेदारीमा नेपाल–पाकिस्तानमैत्री तथा सांस्कृतिक संघले दूतावासमा आयोजना गरेको कार्यक्रममा उनले काश्मिरी जनताको आत्मनिर्णयको अधिकारको सम्मान गर्दै समस्याको शीघ्र समाधान खोजिनुपर्नेमा जोड दिए ।

राजदूत जावेदले बितेका एक वर्षमा भारत प्रशासित काश्मिरमा मानवाधिकार उल्लंघनका धेरै घटना भएकाे र त्यसको जानकारी अन्तर्राष्ट्रिय समुदायलाई समेत भएको बताउँदै काश्मिरीको आत्मनिर्णयको अधिकारको सुनिश्चितता तथा निष्पक्ष एवं स्वतन्त्र जनमतसङ्ग्रहका लागि सघाउन अन्तर्राष्ट्रिय समुदायसँग आग्रह गरे ।

‘दक्षिण एसियाको शान्ति, प्रगति र स्थायित्वका निम्ति काश्मिर समस्याको शीघ्र समाधान हुनुपर्छ, काश्मिरी जनतासँग पाकिस्तान सरकारको समर्थन छ,’ सत्तरी वर्षदेखिको द्विपक्षीय समस्याले दक्षिण एशियामा अस्थिरता निम्तिएको बताउँदै उनले भने । संघका महासचिव मञ्जुरत्न शाक्यले वार्ताका माध्यमबाट समस्याको निकास खोज्न भारत सकारात्मक हुनुपर्ने बताए ।