देश

न्यूरो अस्पतालका चिकित्सकमा पनि कोरोना

विराटनगर, साउन १७–विराटनगरस्थित न्यूरो अस्पतालका एक चिकित्यकमा पनि कोरोना संक्रमण पुष्टि भएको छ । यस अघि विराटन नर्सिङ होम, म्याक्स र कोशी अस्पतालमा कार्यरत कर्मचारी, स्वास्थ्यकर्मी र चिकित्सकमा कोरोना संक्रमण देखिएकोमा न्युरो अस्पतालका चिकित्सकमा पनि कोराना संक्रमण भएको हो ।

विराटनगर महानगरपालिकाका अनुसार न्यूरो अस्पतालको इमरजेन्सी वार्डमा कार्यरत चिकित्सकमा संक्रमण देखिएको हो । संक्रमित चिकित्सक विराट नर्सिङहोममा पनि कार्यरत थिए । संक्रमित चिकित्सकलाई विपी कोइराला स्वास्थ्य विज्ञान प्रतिष्ठान धरानको आईसालेसनमा पठाइएको छ ।

महानगरपालिका जनस्वास्थ्य महाशाखा प्रमुख रमेश कार्कीका अनुसार न्युरो अस्पतालका संक्रमित चिकित्सकले काम गर्ने कक्ष सिल गर्न लगाएर उनीसँगको सम्पर्कमा आएका कर्मचारीलाई क्वारेन्टाइनमा बस्न लगाइएको छ ।

न्यूरो अस्पताल विराटनगरका निर्देशक राजेश भट्टराईले संक्रमित चिकित्सकले काम गरेको इमरजेन्सी कक्ष सिल गरिएको जानकारी दिए । संक्रमित चिकित्सकको सम्पर्कमा रहेर काम गरेका कर्मचारीलाई क्वारेन्टाइनमा राखिएको उनले बताए ।

संक्रमित व्यक्तीले काम गरेको स्थानमा डिसइन्फेक्सन स्प्रे गरेर क्वारेन्टाइनमा रहेका स्वास्थ्यकर्मीको नमुना संकलन गरिएको उनले बताए । समुदायमा तिब्र गतिमा संक्रमण फैलिँदै गएपछि शनिबारबाट विराटनगर महानगरपालिकाले १४ दिनका लागि लकडाउन लागु गरेको छ ।