देश

सीमानाकाबाट नेपाल भित्रिने सबैको कोरोना परीक्षण गराउन मन्त्रालयको आग्रह

काठमाडौं, १७ साउन-स्वास्थ्य तथा जनसंख्या मन्त्रालयले स्थलमार्ग हुँदै सीमानाकाबाट नेपाल भित्रिने नागरिकको स्वाब संकलन गरी कोरोना परीक्षण गर्न आग्रह गरेको छ । धेरै ठाउँमा भारतबाट आएका व्यक्तिहरूलाई परीक्षण नगरी घर पठाउने गरेको पाइएकोले त्यस्तो नगर्न मन्त्रालयले आग्रह गरेको हो ।

मन्त्रालयका प्रवक्ता डा. जागेश्वर गौतमले भारतलगायत तेस्रो मुलुकबाट आउने सबैलाई क्वारेन्टाइनमा राखेर स्वाब संकलन गरी कोरोना परीक्षण गराउन सबै स्थानीय तहलाई आग्रह गरे । उनले नेगेटिभ नतिजा आएपछि मात्रै होम क्वारेन्टाइनमा जान दिन र पोजिटिभ नतिजा आएकालाई आइसोलेसनमा राख्नसमेत आग्रह गरेका छन् । उनले पछिल्लो समय भारतबाट लुकीछिपी नेपाल भित्रिनेको संख्या बढ्दै गएको र क्वारेन्टाइनमा पनि नबस्ने गरेको पाइएको उल्लेख गर्दै यसबाट समुदायमा कोरोना फैलिने जोखिम बढेकाले सचेत हुनुपर्ने बताए ।

सिंहदरबारभित्र र अन्य कार्यालयमा काम गर्ने कर्मचारी, सुरक्षाकर्मी र स्वास्थ्यकर्मीहरूले समेत सामाजिक दूरी कायम नगरेको सूचना प्राप्त भएकाले त्यस्तो नगर्न प्रवक्ता डा. गौतमले आग्रह गरे । सही तरिकाले मास्क लगाउन, सामाजिक दूरी कायम गर्न, २५ जनाभन्दा बढी भेला नहुने उनले आग्रह गरे । कारागार, हिरासत कक्ष, सुधार गृह जस्ता स्थानमा क्षमताभन्दा बढी मानिस राख्नुपर्ने बाध्यता रहे पनि आवश्यक सतर्कता अपनाउन उनले आग्रह गरे ।