देश

यो वर्ष विराटनगरमा रथ यात्रा रोकियो

विराटनगर, असार २७–दक्षिण एशियाकै दोश्रो ठुूलो रथयात्रा मानिएको विराटनगरको श्रीराधाकृष्ण रथयात्रा यो वर्ष ननिकालिने भएको छ । कोरोना संक्रमणको जोखिमलाई ध्यानमा राखेर आयोजक समितिले रथयात्राको ५३ औं संस्करण स्थगन गरेको हो । प्रत्येकबर्ष श्रीकृष्ण जन्माष्टमीको भोलीपल्ट विराटनगरमा आयोजना हुँदै आएको ऐतिहासिक श्रीराधाकृष्ण रथयात्रा यसपटककालागि स्थगन गरिएको छ ।

आयोजक मन्दिर कार्यसमितिले शनिवार विराटनगरमा पत्रकार सम्मेलनको आयोजना गर्दै यसपटकका लागि रथयात्रा स्थगन गर्ने निर्णय सार्वजनिक गरेको छ । पत्रकार सम्मेलनमा मन्दिर कार्य समितिका अध्यक्ष बाबुराजा ओझाले बिश्वब्यपी महामारिकारुपमा रुपमा फैलिएको कोरोनाको संक्रमणकालिन अवस्थालाई ध्यानमा राखेर यसपटक रथयात्रा स्थगनगर्ने निर्णय भएको बताए ।

मन्दिर समितिले यसपटक रथयात्राका साथै बार्षिकरुपमा मनाउदै आएको झुलन महोत्सव र जन्माष्टमीका अन्य सम्पुर्ण कार्यक्रमहरु समेत स्थगन गरेको उनले बताए ।

संक्रमणको जोखिमपूर्ण अवस्थाका कारण रथयात्रा स्थगन गरेको कार्यसमितिले अनौपचारिकरुपमा खट्को पुजाआजा भने गर्ने जनाइएको छ । प्रत्येक बर्ष रथयात्राको क्रममा अग्रभागमा डुलाउने गरिएको खट्लाई यसपटक आन्तरिकरुपमा पुजापाठ गरिने जनाइएको छ ।

धार्मिक परम्परा र मान्यता जोगाउन आन्तरीकरुपमा खट्को पुजाआजा गरिने तयारी गरिएपनि त्यसमा सर्वसाधारणलाई सहभागि नगराईने विराटनगर महानगरपालिकाका मेयर भीम पराजुलीले बताए ।

महामारीको संक्रमणबाट जोगिन विश्व स्वास्थ्य संगठनले विश्वभरिका मानिसहरुकालागि जारी गरेको प्रोटोकोललाई मध्यनजर गर्दै सरोकारवालीबीच भएको पटकपटकको छलफलपछि यसपटक रथयात्रा स्थगन गर्ने निर्णय भएको जिल्ला प्रहरी कार्यालय मोरङका प्रमुख प्रहरी उपरिक्षक सन्तोष खड्काले बताए ।

विक्रम सम्बत १९८८ सालमा भगवान श्रीराधाकृष्णको मृर्तिलाई खटमा राखी कांधमा बोकेर पहिलोपटक विराटनगर पोखरियास्थित मन्दिर परिसरबाट खट्यात्रा निकालिएको इतिहास छ ।

सोहि खटयात्रालाई परिमार्जनगर्दै विराटनगरका केहि समाजसेवीहरुले २०२५ सालबाट रथयात्रामा रुपान्तरण गरेका थिए । त्यसयता बितेको बर्षसम्म रथयात्राको ५२ वाट संस्करणहरु अत्यन्त सफलता र भब्यताका साथ सम्पन्न भइसकेका छन् । धार्मिक सहिष्णुता र आस्थाको प्रतिककोरुपमा स्थापित भइसकेको रथयात्रामा विभिन्न सम्प्रदाय र बर्गका लाखौं मानिसहरु सहभागि हुँदै आएका छन ।

Featured