विदेश

अमेरिकामा एकैदिन थपिए ६२ हजार कोरोना संक्रमित

एजेन्सी, असार २५-संयुक्त राज्य अमेरिकामा २४ घण्टामा अहिलेसम्मकै बढी कोरोना संक्रमित थपिएका छन् । वल्डोमीटरका अनुसार त्यहाँ गत २४ घण्टामा अहिलेसम्मकै बढी ६१ हजार ८ सय संक्रमित थपिएका हुन् । योसँगै अमेरिकामा संक्रमितको संख्या ३१ लाख ५८ हजार नाघेको छ ।

त्यस्तै, पछिल्लो २४ घण्टामा त्यहाँ ८ सय ९० कोरोना संक्रमितले ज्यान गुमाएका छन् । योसहित अमेरिकामा यो भाइरसबाट मृत्यु हुनेको संख्या १ लाख ३४ हजार ८ सय ६२ पुगेको छ ।

त्यहाँ कोरोना जितेर घर फर्कंनेको संख्या पनि बढ्दै गएको छ । हालसम्म अमेरिकामा १३ लाख ९२ हजार ६ सय संक्रमित उपचारपछि निको भएका छन् । अहिले त्यहाँ १६ लाख ३१ हजार संक्रमितको उपचार जारी छ । जसमध्ये १५ हजार ४ सय संक्रमितको अवस्था गम्भीर रहेको छ ।

त्यस्तै, गत २४ घण्टामा ब्राजिलमा साढे ४१ हजार नयाँ संक्रमित थपिँदा १ हजार १ सय ८७ जनाको मृत्यु भएको छ । योसँगै त्यहाँ संक्रमितको संख्या १७ लाख १६ हजार नाघेको छ । जसमध्ये ६८ हजारको मृत्यु हुँदा ११ लाख १८ हजार व्यक्ति संक्रमणमुक्त भएका छन् ।

गत २४ घण्टामा साढे २५ हजार नयाँ संक्रमित भेटिएका छन् । योसँगै त्यहाँ कूल संक्रमितको संख्या ७ लाख ६९ हजार पुगेको छ । जसमध्ये २१ हजार १४४ जनाको मृत्यु हुँदा ४ लाख ७६ हजार संक्रमित निको भएका छन् ।

बिहीबार बिहानसम्म विश्वभर संक्रमितको संख्या १ करोड २१ लाख ६४ हजार नाघेको छ । जसमध्ये ७० लाख ३० हजार निको हुँदा ५ लाख ५२ हजारले ज्यान गुमाएका छन् ।

Featured