देश राजनीति

सुवास नेम्वाङ भन्छन् : मलाई प्रधानमन्त्रीको अफर आइरहेको छ 

काठमाडौं, १९ असार-सत्तारुढ दल नेपाल कम्युनिस्ट पार्टी (नेकपा)का संसदीय दलका उपनेता सुवासचन्द्र नेम्वाङले आफूलाई प्रधानमन्त्रीको प्रस्ताव आइरहेको बताएका छन् ।

सिंहदरबारस्थित संसदीय दलको कार्यालयमा सञ्चारकर्मीहरूसँग कुराकानी गर्दै उनले विभिन्न स्थानबाट प्रधानमन्त्रीको प्रस्ताव आए पनि स्वीकार भने नगरेको बताए ।

‘नेकपाभित्र छलफल चलिरहेको बखतमा मलाई प्रधानमन्त्री बन्नु पर्‍यो भनेर विभिन्न नेता र तथाकथित् शक्ति केन्द्रहरूबाट प्रस्ताव आएको थियो,’ नेम्वाङले सञ्चारकर्मीसँग भने, ‘तर, अहिले म प्रधानमन्त्री बन्ने बेला होइन, देशलाई राजनीतिक स्थिरता दिने बेला हो, प्रधानमन्त्री हटाएर अर्को प्रधानमन्त्री बनाउने बेला होइन भनेर जवाफ दिएको छु ।’

उनका अनुसार प्रधानमन्त्री बन्नका लागि विभिन्न नेता र शक्ति केन्द्रहरूले छलफलका लागि बोलाएका थिए तर उनी गएनन् ।  उनले कुनकुुन शक्ति केन्द्रले ‘प्रधानमन्त्री अफर’ गरेको हो, त्यो भने उनले खुलाउन चाहेनन् । उनले प्रस्तावकहरूलाई आफू प्रधानमन्त्री बन्न तयार नभएको बताए पनि भेटघाटका लागि समय भने माग गरिरहेको बताए ।

Featured