विदेश

उत्तर कोरिया कोरोना संकट रोक्न सफल : किम

एजेन्सी, असार १९-उत्तर कोरियाका नेता किम जोङ उनले कोरोना संकट रोक्न देशले चामत्कारिक सफलता हात पारेको बताएका छन् । पार्टी पोलिटब्यूरोको बैठकका क्रममा किम जोङ उनले उत्तर कोरियाले भाइरस फैलिनबाट रोकेर देशलाई हरहालतमा स्थिर बनाइराखेको बताएका हुन् ।

कोरोना भाइरस संक्रमण सुरु हुँदा ६ महिनाअघि नै उत्तर कोरियाले आफ्नो सीमा सिल गरेर हजारौँ मानिसलाई आइसोलेसनमा पठाएको थियो । उत्तर कोरियामा एक जना पनि कोरोना संक्रमित नरहेको बताइएको छ । यद्यपि विश्लेषकहरूले यो दाबी गलत भएको बताउँदै आएका छन्।

पोलिटब्यूरोको बैठकमा उनले महामारीविरुद्धको कार्ययोजनाबारे लामो व्याख्या गर्दै अझै पनि छिमेकी देशहरूमा कोरोना संक्रमणको महामारी रहेको भन्दै उच्च सतर्कता अपनाउन आग्रह गरेका छन् ।

जनवरीको अन्त्यदेखि नै उत्तर कोरियाले कोरोना भाइरसको महामारी रोक्नका लागि तत्कालै कदम चालेको थियो । देशको सीमा सिल गरेर प्योङयाङमा रहेका विदेशी नागरिकलाई क्वारेन्टाइनमा पठाएको थियो ।

यस्तै, उसले सयौँ मानिसलाई आइसोलेसनमा पठाएको थियो । उत्तर कोरियामा स्कुलसमेत बन्द गरिएका थिए ।उत्तर कोरियामा हालै विद्यालयहरू खोलिए पनि मानिसहरूलाई सार्वजनिक स्थानमा भेला हुन प्रतिबन्ध कायमै छ । उत्तर कोरियामा सार्वजनिक स्थानमा मास्क लगाउन अनिवार्य गरिएको छ ।

विश्व स्वास्थ्य संगठनले उत्तर कोरियामा हालसम्म शंकास्पद ९२२ जनाको परीक्षण गरिएको र सबै जनाको रिपोर्ट नेगेटिभ आएको जनाएको छ । उत्तर कोरियाको लामो सीमा चीन र दक्षिण कोरियासँग जोडिएको छ ।

Featured