देश राजनीति

गोप्य सहमतिका साक्षीसहित बालुवाटारमा ओली–प्रचण्ड छलफल

काठमाडौं, १९ असार-सत्तारुढ नेपाल कम्युनिस्ट पार्टी (नेकपा) का अध्यक्ष तथा प्रधानमन्त्री केपी शर्मा ओली र अर्का अध्यक्ष पुष्पकमल दाहालबीच बालुवाटारमा छलफल सुरु भएको छ ।

पार्टीको विवाद समाधानको प्रयासस्वरुप दुई अध्यक्षबीच बालुवाटारमा छलफल सुरु भएको हो । छलफलमा दुई अध्यक्षका साथै महासचिव विष्णु पौडेल र स्थायी समिति सदस्य जनार्दन शर्मासमेत सहभागी छन् । पौडेल र शर्मा दुई अध्यक्षबीच समानताका आधारमा दुई अध्यक्षले पालैपालो सरकारको नेतृत्व गर्ने गोप्य सहमति हुँदाका साक्षीसमेत हुन् ।

दुई अध्यक्षबीचको छलफलमा पार्टीभित्र पछिल्लो समयमा देखा परेको समस्या समाधान गरी पार्टीलाई एकढिक्का बनाएर अघि बढाउने विषयमा छलफल हुनेछ ।

पार्टी स्थायी कमिटी बैठकमा अधिकांश नेताहरु अध्यक्ष केपी शर्मा ओलीको विपक्षमा उभिएका छन् । बैठकमा अधिकांश नेताहरूले ओलीलाई अध्यक्ष र प्रधानमन्त्री दुवै पद छाड्न दबाब दिएका छन् ।

ओलीले आफूलाई हटाउन दूतावासदेखि होटलसम्म षढ्यन्त्र भइरहेको बताएपछि नेताहरूले त्यसबारेमा स्पष्ट पार्न माग गरेका छन् । ओलीले भने अप्ठ्यारो परेपछि संसदको जारी अधिवेशनसमेत अन्त्य गरिदिएका छन् ।

संसद अधिवेशन अन्त्य नगर्ने दुई अध्यक्षबीच सहमति भएको केही समयपछि नै ओलीले सो कदम चालेपछि प्रचण्डले बिहीबार राष्ट्रपति विद्या भण्डारीलाई भेटेर पार्टीको एक खेमाको निर्णयका पक्षमा नउभिन आग्रह गरेका थिए । पार्टीभित्रको आन्तरिक विवादबारे छलफलपछि मात्रै स्थायी कमिटी बैठक बस्ने सहमति भएअनुसार दुई अध्यक्ष छलफलमा जुटेका हुन् ।

Featured