देश राजनीति

बजेटका कमजोरी सच्याउने मुख्यमन्त्री राईको प्रतिबद्धता

विराटनगर,  १७ असार-प्रदेश १ का मुख्यमन्त्री शेरधन राईले आगामी आर्थिक वर्ष २०७७/०७८ को बजेटमा केही कमजोरी रहेको हुन सक्ने स्वीकार गरेका छन् ।आगामी दिनमा ती कमजोरी सच्याउने दिशामा आफू केन्द्रित भएको उनले बताए । प्रतिपक्षी मात्रै नभएर सत्तापक्षकै सांसदहरुले बजेटबारे चर्को असन्तुष्टि जनाइरहेको बेला मुख्यमन्त्री राईले प्रदेशसभामा जवाफ दिँदै कमजोरी सच्याउने प्रतिबद्धता जनाएका छन् ।

‘केही न केही समस्याहरु र असन्तुष्टि प्रकट भएको कुरा मेरो नोटिसमा छ,’ मुख्यमन्त्री राईले भने,‘केही न केही कमजोरी हुँदै आएका छन् । ती कमजोरी सच्याउने दिशामा म केन्द्रित छु । ब्याकडोरबाट अर्थात् झ्याल, ढोकाबाट योजना छिराउने कुरालाई रोकेर हामीले यसपटक बजेट ल्याउने कोशिस गरेका छौं ।’

मुख्यमन्त्री राईले बजेट नेकपा संसदीय दलको नेता मुख्यमन्त्रीको नेतृत्वमा निर्माण भएकाले बजेटप्रति सत्ता पक्षका सांसदहरुले गर्व गर्नुपर्ने पनि बताए । उनले बजेटमा खुसी भएर आम जनसमुदाय, मिडिया, बैठक तथा भेलाहरुमा सत्तापक्षका सांसदहरुले निर्भिक भएर कुरा राख्न सक्नुपर्नेमा जोड पनि दिए ।

Featured