देश राजनीति

भारतीय मिडियाको दाबीः प्रधानमन्त्री ओलीको कुर्सी खतरामा

काठमाडौं, १७ असार-नेपालबारे कममात्रै समाचार छापिने भारतीय सञ्चारमाध्यममा पछिल्लो समयमा नेपाली भूभाग लिम्पियाधुरा, लिपुलेक, कालापानीलाई नक्सामा समावेश गरेसँगै भारतीय सञ्चारमाध्यममा प्राथमिकता पाउन थालेका छन् ।

सत्तारुढ नेकपाको स्थायी समिति बैठकमा प्रधानमन्त्री केपी शर्मा ओलीको राजीनामा मागिएको समाचारलाई भारतका सञ्चारमाध्यमले प्राथमिकताका साथ छापेका छन् ।

भारतीय सञ्चारमाध्यमले नेपालको नयाँ नक्सा जारी गर्नका लागि प्रधानमन्त्री ओलीको भूमिका रहेको उल्लेख गर्दै आएका छन । त्यसैले भारतीय सञ्चारमाध्यमले ओलीविरुद्धका समाचारलाई पनि प्राथमिकता दिइरहेका छन् । दैनिक भास्करको अनलाइन संस्करणले नेकपाका सबै शीर्ष नेताले ओलीको राजीनामा मागेको विषयमा समाचार प्रकाशितत गरेको छ ।

भारतमाथि सरकार ढाल्ने कोशिस गरेको आरोप लगाएपछि नेपालका प्रधानमन्त्री ओलीको कुर्सी खतरामा परेको भन्दै ओलीले यसमाथि स्पष्टिकरण दिएपनि त्यसले उनको कुसी बचाउन कठिन हुने उल्लेख गरेको छ ।

ओलीमाथि भारतसँग सम्बन्ध बिगारेको र ढुलमुले रवैया अपनाएका कारण चीनले पनि नेपाली भूमि मिचेको आरोप लागेको उल्लेख गरेको छ । भास्करले प्रधानमन्त्रीले एक पटक फेरि भारतविरोधी कार्ड खेल्न लागेको र आफ्नो असफलता लुकाउन गलत हथकन्डा अपनाएर ध्यान अन्यत्र मोड्न खोजेको आरोप लागेको उल्लेख गरेको छ ।

Featured