देश विदेश

विश्वभर ५८ लाख संक्रमितले जिते कोरोना, अमेरिकामा मात्रै ११ लाखभन्दा बढी निको भए

काठमाडाैं, १७ असार-संसारभर झण्डै ५८ लाख जनाले कोरोना भाइरस (कोभिड(१९)लाई जितेका छन् । १ करोड ५८ लाखभन्दा बढी संक्रमितमध्ये ५७ लाख ९५ हजार जना निको भएका हुन् ।

संक्रमितमध्ये ५ लाख १३ हजारभन्दा बढीको मृत्यु भएको छ । कोरोना भाइरस जित्नेको संख्या सबैभन्दा धेरै अमेरिकामा छ, जहाँ ११ लाख ४३ हजार ३ सय ३४ जना निको भएका छन् । अमेरिकामा कुल संक्रमित संख्या २७ लाख २७ हजार ८ सय ५३ छ, यीमध्ये १ लाख ३० हजार १ सय २२ जनाको मृत्यु भएको छ ।

जोन्स् हप्किन्स विश्वविद्यालयले संकलन गरेको तथ्याङ्कअनुसार अमेरिकापछि ७ लाख ९० हजार ४० ब्राजिलियनले कोरोनालाई जितेका छन् । यी २ मुलुक कोरोनाबाट सबैभन्दा बढी मानवीय क्षति बेहोरिरहेका छन् । संक्रमित संख्या १४ लाख ८ हजारभन्दा बढी रहेको ब्राजिलमा ५९ हजारभन्दा बढी मानिसले कोरोनाका कारण ज्यान गुमाइसकेका छन् ।

यद्यपि, अमेरिका र ब्राजिलमा मृतकभन्दा निको हुनेको संख्या बढ्दो छ ।  विश्वका कुल संक्रमितमध्ये आधा अमेरिका र युरोपमा छन् ।ब्राजिलपछि सबैभन्दा धेरै रुस, भारत, चिली, पेरुमा निको भएका छन् ।

कुल ६ लाख ४७ हजार संक्रमित रहेको रुसमा अहिलेसम्म ४ लाख १२ हजार जना निको भएर घर फर्किएका छन् । यस्तै, संक्रमितको संख्या ५ लाख ८५ हजार रहेको भारतमा ३ लाख ४७ हजार जनाले कोरोना जितेका छन् । भारतमा कोरोना संक्रमितमध्ये १७ हजार ४ सय र रुसमा ९ हजार ३ सय जनाको मृत्यु भएको छ ।

२ लाख ७९ हजार संक्रमित संख्या रहेकाे चिलीमा ५ हजार ६ सय जनाको मृत्यु हुँदा २ लाख ४१ हजार जनाले कोरोना जितेका छन् । यसैगरी, २ लाख ८५ हजार २ सय १३ जना संक्रमित रहेको पेरुमा ९ हजार ६ सय जनाको मृत्यु हुँदा १ लाख ७४ हजार जना निको भएका छन् ।

कोरोना भाइरसले दक्षिण एसिया र अफ्रिकालाई पनि प्रभावित तुल्याइरहेको छ ।  नेपालमा पनि निको भएर घर फर्किनेहरूको संख्या दैनिक बढिरहेको छ । कुल संक्रमित संख्या १३ हजार ५ सय ६४ जनामध्ये ३ हजार १ सय ९४ जना निको भएर घर फर्किइसकेका छन् । संक्रमितमध्ये २९ जनाको मृत्यु भएको छ ।

Featured