देश

चितवनमा स्कर्पियो दुर्घटनामा १ जनाको मृत्यु, २ गम्भीर

हेटौंडा, १५ असार-नारायणगढ–मुग्लिन सडकखण्डअन्तर्गत् सत्रकिलो भन्ने स्थानमा ग्यास बुलेट र स्कर्पियो एकआपसमा ठोक्किँदा १ जनाको मृत्यु भएको छ । गैरसरकारी संस्था महासंघ मकवानपुरका अध्यक्ष कृष्ण धितालको परिवार नै दुर्घटनामा परेको छ । स्कर्पियोमा कृष्णसहित पत्नी ४७ वर्षीया प्रभा पौडेल, २५ वर्षीय छोरा अनुज धिताल, छोरी २७ वर्षीया वर्षी धिताल र चालक राजन घिमिरे सवार थिए । मुग्लिनबाट नारायणगढतर्फ आइरहेको बा १३ च ५९२९ नम्बरको स्कर्पियो र विपरीत दिशाबाट आइरहेको भारतीय एनएल ०१ क्यू ५१०६ नम्बरको ग्यास बुलेट एकआपसमा ठोक्किएको थियो ।

पत्नी ४८ वर्षीया प्रभाको उपचारको लागि चितवनस्थित पुरानो मेडिकल कलेज ल्याउने क्रममा बीचबाटोमै मृत्यु भएको चितवन प्रहरी प्रवक्ता प्रहरी नायव उपरीक्षक सूर्यबहादुर थापाले जानकारी दिए । अन्य ४ जना घाइते भएको उनले बताएका छन् । घाइतेमध्ये चालक घिमिरे र छोरा अनुजको अवस्था गम्भीर रहेको छ । उनीहरूको पुरानो मेडिकल कलेजमा उपचार भइरहेको प्रहरी प्रवक्ता थापाले बताए ।

चालक घिमिरे र छोरा अनुजको टाउको र छातीमा गम्भीर चोट लाग्नुका साथै खुट्टा फ्याक्चर भएको थापाले जानकारी दिए । ‘चालक र अनुजको अवस्था गम्भीर छ । कृष्ण धिताल र छोरीको अवस्था सामान्य छ ।’ प्रहरी नायव उपरीक्षक थापाले भने । ग्यास बुलेट फरार रहेको जनाइएको छ ।

Featured