देश राजनीति

एमसीसीको पक्षमा मतदान गरे जनकारबाही गर्ने मन्त्री भट्ट र देउवालाई विप्लवको चेतावनी

डडेल्धुरा, ११ असार-पूर्वप्रधानमन्त्री तथा नेपाली कांग्रेसका सभापति शेरबहादुर देउवा र उद्योग वाणिज्य तथा आपूर्ति मन्त्री लेखराज भट्टलाई नेत्रविक्रम चन्द विप्लव नेतृत्वको नेपाल कम्युनिष्ट पार्टीले जनकारबाही गर्ने चेतावनी दिएको छ ।

धनगढी उपमहानगरपालिका–४ उत्तरबेहडीस्थित देउवा निवासको गेटमै विप्लवका कार्यकर्ताले जनकारबाही गर्ने पत्र टाँसेका छन् । यस्तै, कैलालीमै रहेको मन्त्री भट्टको घर पुगेर विप्लवका कार्यकर्ताले मिलिनियम च्यालेन्ज कर्पारेसन (एमसीसी) को पक्षमा मतदान गरे जनताबाट बहिष्कारदेखि जनकारबाही गर्ने चेतावनी सहितको पत्र दिएका हुन् ।

‘यतिखेर कोरोना भाइरस महामारीको बीचमा पनि एमसीसीलाई लिएर सिंगो देश संघर्षमय बनेको छ । उक्त राष्ट्रघाती परियोजनालाई वैधानिकता दिने वा खारेज गर्ने भन्ने विषयलाई लिएर नेपालको प्रतिनिधि सभा तथा राष्ट्रिय सभामा पनि संघर्षका केन्द्र बन्ने देखिदैछन्’ पत्रमा भनिएको छ, ‘राष्ट्रियतासम्बन्धी जनताको म्यान्डेडको कदर गर्दै सदनमा एमसीसी परियोजना सम्बन्धि प्रस्तावको विपक्षमा मतदान गर्नुहुनेछ भन्ने अपेक्षा आम राष्ट्रप्रेमी कैलालीबासीहरुको रहेको छ ।’

यदि नेपाली जनताको राष्ट्रभक्तिको भवना, आवाज र अपिलविपरीत तपाईद्वारा उक्त राष्ट्रघाती प्रस्तावको पक्षमा मतदान गरिएको खण्डमा जनस्तरबाट बहिस्कारदेखि जनकारबाहीको सामना गर्न तपाई तयार रहनुहुनेछ भन्ने कुरा पनि अवगत गराउन चाहान्छौ भनि चेतावनीसमेत दिएको छ ।

Featured