देश राजनीति

मन्त्रीले आफ्नो क्षेत्रमा मात्र बजेट केन्द्रीत गरेको सांसदहरुको आरोप

विराटनगर, असार ११–प्रदेश सरकारका मन्त्रीहरूले आफ्नो निर्वाचन क्षेत्रमा मात्रै बजेट केन्द्रित गरेको सांसदहरूले आरोप लगाएका छन् । प्रदेशसभाको शुन्य समयमा बोल्ने सांसदहरूले प्रदेश सरकारका मन्त्रीहरूले आफ्नो क्षेत्रमा मात्रै बजेट केन्द्रित गरेको आरोप लगाएका हुन् ।

प्रदेश सरकारले सांसदका कुरा नसुनेको भन्दै सांसद कला घलेले प्रदेशसभाको शुन्य समयमा बोल्दै कान थुनेर आफ्नो क्षेत्रका समस्या राखेकी छन् । घलेले बारम्बार एउटै समस्या सरकारलाई राख्दा पनि कुनै सुनुवाई नभएपछि कान थुनेर संसदमा समस्या सुनाउनु परेको गुनासो गरिन् । घलेले सरकार कामकाजी हो वा नामकाजी भन्दै प्रश्नसमेत गरिन् ।

घलेले प्रदेशको बजेट विनियोजन न्यायोचित नभएको गुनासो पनि गरिन् । उनले मन्त्रीका निर्वाचन क्षेत्रमा हुलका हुल योजनामा बजेट विनियोजन गरिएको र सांसदका क्षेत्रमा फाटफुट योजनामा मात्रै बजेट विनियोजन गरिएको गुनासो गरिन् ।

सांसद हिमाल कार्कीले प्रदेश सरकारले बजेट विनियोजन गर्दा न्यायोचित रुपमा विनियोजन नगरेको आरोप लगाए । कार्कीले डाडुपन्यु आफ्नो हातमा भए पछि मनोमानि गर्ने प्रचलन प्रदेशमा देखिएको बताए ।

शुन्य समयमा सांसद उत्तमकुमार बस्नेत, लोकप्रसाद संग्रौलालगायतले बोलेका थिए । आजको संसद बैठकमा भूमि कृषि तथा सहकारी राज्यमन्त्री रामबहादुर मगरले संसदले शुन्य समयमा उठाएका प्रश्नको जवाफ दिएका थिए ।

Featured