देश

उद्योग कलकारखानाहरुको व्यवस्थापनका लागि प्रदेश सरकारले सहजिकरण गर्ने

विराटनगर, असार १०–प्रदेश नं. १ का उद्योग पर्यटन वन तथा वातावरण मन्त्री जगदीश प्रसाद कुशियैतले लकडाउनको मारमा परेका उद्योगद्यन्दा तथा कलकारखानाहरुको व्यवस्थापनका लागी प्रदेश सरकारले सहजीकरण गर्ने बताएका छन् ।

प्रदेश नं. १ प्रदेशसभा बजेट अधिवेशनको आज बसेको बैठकमा बोल्दै उनले यस्तो बताएका हुन् । बजेट अधिवेशनको विभिन्न बैठकमा उठाइएका प्रश्न तथा जिज्ञासाका सम्बन्धमा जवाफ दिँदै मन्त्री कुशियैतले लकडाउनको मारमा परेका साना व्यापार, व्यावसाय तथा उद्योग÷कलकारखानाहरुलाई पुनः सञ्चालनमा ल्याउन घरेलु तथा साना उद्योग कार्यालयहरुमार्फत व्यावसाय सञ्चालनमा सहजीकरण गरिने जानकारी गराए ।

मन्त्री कुशियैतले आगामी आर्थिक बर्षमा साना तथा घरेलु उद्योग कार्यालयहरु मार्फत महिला, सीमान्तकृत र विपन्न वर्गका नागरिकलाई समेत समेटने गरि सीप तथा क्षमता अभिवद्धिका क्रियाकलापहरु सञ्चालन गरिने स्पष्ट पारे ।

त्यस्तै बिशेष समय लिएर बोल्दै प्रदेश नं. १ की प्रदेशसभा सदस्य बिष्णु तुम्बाहाम्फेले जेठ २६ गते राती तेह्रथुम जिल्लाको फेदाब गाउँपालिका–१ पोक्लागुङस्थित आदिबासी लिम्बु समुदायको चिहान डोजर लगाई भत्काइएको भन्दै आपत्ति जनाइन् । उनले बसपार्क निमार्णकै लागी लिम्बु समुदायको समाधि स्थल भत्काउनु नेपालको संविद्यानको मुल मर्म र भावना विपरित भएको भन्दै सो को पुनरनिमार्णका लागी प्रदेश सरकारसँग माग गरिन् ।

त्यसैगरि सांसद राजकुमार ओझाले प्रत्येक पालिकामा एउटा खेलमैदान निमार्ण गर्ने, एउटा पालिकामा भएका ५–५ वटा आधारभुत तथा माध्यमिक विद्यालयहरुमा सहयोग गर्ने र खानेपानीको उचित प्रबन्ध मिलाउने लगायतका योजनाहरु ओझेलमा पर्दै गएको भन्दै प्रदेश सरकारको ध्यानाकर्षण गराए ।

त्यस्तै संसद बैठकको शून्य समयमा बोल्दै सांसद बसन्त कुमार बानियाले मलजलको अभावका कारण कृषकहरुमा रुवाबासी छाएको भन्दै प्रदेश सरकारको ध्यानाकर्षण गराए ।

सांसद मोहन खडकाले होल्डिङमा राखिएका नागरिकहरुलाई व्यवस्थित ढंगले सम्बन्धित स्थानीय निकायको जिम्मा लगाउन आग्रह गरे । प्रदेश नं. १ प्रदेशसभा बजेट अधिवेशनको अर्को बैठक बिहिबार १२ बजे बस्ने गरि बोलाइएको स्रदेशसभा सचिवालयले जनाएको छ ।

Featured