देश

नेपालमा कोरोना संक्रमितको संख्या १० हजार नाघ्यो, आज थपिए ५३८ जना

काठमाडौं, ९ असार-नेपालमा कोरोना भाइरस संक्रमितको संख्या १० हजार नाघेको छ । नेपालमा पछिल्लो २४ घण्टाको अवधिमा थप ५३८ जनामा कोरोना संक्रमण पुष्टि भएसँगै संक्रमितको आंकडाले १० हजार पारे गरेको हो ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले देशभरका विभिन्न प्रयोगशालामा गरिएको परीक्षणमा ९० महिला र ४४८ पुरुष गरी देशभर ५३८ जनामा कोरोना संक्रमण पुष्टि भएको बताए । रसुवाबाहेक अरू सबै जिल्लामा कोरोना संक्रमण फैलिएको बताए । योसँगै नेपालमा कोरोना संक्रमितको संख्या १० हजार ०९९ पुगेको छ ।

पछिल्लो २४ घण्टाका अवधिमा ८ महिला र ६८ पुरुष गरी ७६ जना कोरोनालाई जितेर डिस्चार्ज भएको स्वास्थ्य मन्त्रालयले जनाएको छ । हालसम्म १८९ महिला र २ हजार ३५ पुरुष गरी २ हजार २२४ जनाले कोरोना जितेका छन् ।

स्वास्थ्य मन्त्रालयको पछिल्लो विवरणअनुसार पछिल्लो २४ घण्टामा ४ हजार ९९५ नमुना सहित अहिलेसम्म १ लाख ८६ हजार ३६६ नमुनाको पीसीआर विधिबाट परीक्षण गरिएको छ ।

त्यस्तै,  पछिल्लो २४ घण्टामा ३ हजार ४८१ सहित हालसम्म २ लाख ७१ हजार ५२४ जनाको आरडीटी विधिबाट परीक्षण गरिएको छ । त्यस्तै, देशभर ८५ हजार ८१३ क्वारेन्टाइनमा र ७ हजार ८५१ जना आइसोलेसनमा रहेका छन् ।

Featured