देश

स्तरोन्नति नभएको भन्दै दक्षिणकालीमा विरोधस्वरूप सडकमै रोपाइँ

काठमाडौं, ८ असार-सरकारले जस्तै स्थानीय तहहरूले समेत विकास बजेट खर्च गर्न सक्दैन । तर, जनता भने विकास भएन भनेर विरोध गर्नुपर्ने बाध्यता छ । सोही क्रममा दक्षिणकाली नगरपालिका-३ का स्थानीयले सडक मर्मत तथा कालोपत्र नभएको भन्दै विरोधस्वरूप सडकमा रोपाइँ गरेका छन् । सडकमा कालोपत्र, कुलो आदि निर्माण नगरिएको भन्दै विरोधस्वरूप उनीहरूले सडकमै रोपाइँ गरेका हुन् ।

स्थानीयका अनुसार २५ वर्षअघि निर्माण भएको सडक हालसम्म सुरुको दिनमा जस्तो थियो त्यस्तै छ । ‘जुनसुकै दल जुनसुकै प्रतिनिधि आए पनि हाम्रो माग पूरा भएन’, स्थानीय प्रशान्त केसीले भने, हामीले एम्बुलेन्स सहजै सञ्चालन होस् भनेर सडक कालोपत्रको माग गरेका हौँ । बिरामी पर्दासमेत बिरामीलाई अस्पताल पुर्‍याउन नभ्याउने स्थिति छ ।’

‘विकास बजेट भने खर्च नहुने अवस्था रहेको छ सडक निर्माण गर्नुपर्‍यो भनी बजेट माग गर्दा रकम छैन भन्छन्’, अर्का स्थानीय अनिल सिंह बस्नेतले भने, ‘कस्ता जनप्रतिनिधि हुन् । हामीले आफनो व्यक्तिगत विकासका लागि रकम माग गरेका त होइनन् ? बिरामी, अशक्त आदिलाई अप्ठेरो पर्दा सहजै रूपमा गाडीमार्फत जान पाउनु भन्ने हाम्रो माग हो ।’

उनले सडक निर्माणका लागि नगर प्रतिनिधि तथा नगरपालिकालाई भने पनि त्यसको सुनुवाइ हुन नसकेको बताए । करिब २५ जना स्थानीय युवा, वृद्ध, महिला लगायतका स्थानीय सहभागी विरोध कार्यक्रममा उनीहरूले सडकमा धान रोपौँ कि माछा पाल्यौँ, जनप्रतिनिधको पाराले दु:ख पाए साराले, बजेट खल्तीलाई हो कि सडकलाई लगायतका नारा लेखेका प्लेकार्डसमेत बोकेका थिए ।

Featured